Couple dies of shock on Diwali Padwa केडगाव (23 ऑक्टोबर 2025) : सर्वत्र दीपावली पाडव्याची धामधूम सुरू असताना दाम्पत्याचा शॉक लागून मृत्यू झाल्याची बातमी समोर आली आहे. दौंड तालुक्यातील नानगाव येथे दिवाळी पाडव्याच्या दिवशी सायंकाळी साडेचार वाजता शेळीच्या पिल्लाला वाचवण्याच्या प्रयत्नात दाम्पत्याला शॉक लागला. राजाराम बापूराव खळदकर (53)व पत्नी मनीषा राजाराम खळदकर (49, दोघेही रा. नानगाव, ता. दौंड, जि. पुणे) अशी मृतांची नावे आहेत. बुधवार, 22 रोजी सायंकाळी 4.30 वाजेच्या सुमारास ही घटना घडली.
शेळीचे पिल्लू वाचताना दुर्घटना
गावातील राजाराम खळदकर यांच्या शेतातील इलेक्ट्रिक मोटारीच्या पॅनल बॉक्सला काही कारणास्तव विद्युत प्रवाह (करंट) उतरला होता. त्यांच्या शेळीचे पिल्लू त्या परिसरात चरत असताना त्या पॅनल बॉक्सला चिकटले. हे पाहून मनीषा खळदकर ते पिल्लू वाचवण्यासाठी धावल्या, पण त्यांनाही विजेचा जोरदार धक्का बसला आणि त्या पॅनल बॉक्सला चिकटून बसल्या. पत्नीला विजेचा धक्का बसलेला पाहून राजाराम खळदकर त्यांना वाचवण्यासाठी पुढे सरसावले, पण दुर्दैवाने तेही विद्युत प्रवाहात ओढले गेले. या अत्यंत दुर्दैवी घटनेत शेळीच्या पिल्लासह मनीषा खळदकर आणि राजाराम खळदकर यांचा जागीच मृत्यू झाला.
