Ahmedabad Express crushes two youths while they were making a reel on the railway tracks in Paladhi पाळधी (26 ऑक्टोबर 2025) : रेल्वे रूळावर रील बनवण्याची आयडीया तरुणांच्या जीवावर बेतली. धरणगाव तालुक्यातील पाळधी-चांदसर रेल्वे गेटजवळ रेल्वे रूळावर तरुण रील बनवत असताना अहमदाबाद हावडा एक्स्प्रेसने या तरुणांना धडक दिल्याने तरुणांचा जागीच मृत्यू झाला. हा अपघात रविवार, 25 रोजी सकाळी 11 वाजता घडला. प्रशांत पवन खैरनार (18) व हर्षवर्धन महेंद्र नन्नवरे (18) अशी मृतांची नावे आहेत.
रील्स बनवायची हाऊस जीवावर बेतली
पाळधीच्या महात्मा फुले नगर, प्लॉट भाग (रेल्वे गेट जवळील प्लॉट) येथील रहिवासी असलेले दोघे तरुण मित्र पाळधी चांदसर रेल्वे गेटजवळ रेल्वे ट्रॅकवर मोबाईलवरील लोकप्रिय अॅपसाठी व्हिडिओ (रील) तयार करत होते. यावेळी धरणगावकडून जळगावकडे जाणार्या अहमदाबाद-हावडा एक्स्प्रेस गाडीची त्यांना धडक बसली.
हा अपघात इतका भीषण होता की दोन्ही तरुणांचा जागीच मृत्यू झाला. या घटनेची माहिती मिळताच पाळधी पोलिस तातडीने घटनास्थळी दाखल झाले. जिल्हा परिषदेचे माजी सदस्य प्रतापराव पाटील यांच्यासह ग्रामस्थांनी घटनास्थळी धाव घेऊन माहिती जाणून घेतली. पोलिसांनी पंचनामा करण्याची प्रक्रिया सुरू केली. दोघांचे मृतदेह शासकीय वैद्यकीय महाविद्यालय व रुग्णालय जळगाव येथे हलवण्यात आले. घटनेची पाळधी दुरक्षेत्र पोलीस स्टेशन येथे नोंद करण्यात आली.
