Daring robbery in Chalisgaon taluka: Doctor’s family on way to Pune robbed चाळीसगाव (28 ऑक्टोबर 2025) : कार अडवत डॉक्टरांच्या कुटूंबातील सदस्यांकडून दरोडेखोरांनी सव्वा लाखाचा ऐवज लुटल्याची धक्कादायक घटना रविवारी पहाटे 4.15 वाजेच्या सुमारास रांजणगाव, ता.चाळीसगाव फाट्यानजीक घडली. या दरोड्याप्रकरणी चाळीसगाव ग्रामीण पोलिसात गुन्हा दाखल करण्यात आला.
असे आहे लूट प्रकरण ?
पाचोरा येथील डॉ.योगेश नेताजी पाटील यांची तब्येत बरी नसल्याने त्यांना पुणे येथे दाखविण्यासाठी पत्नी नूतन, भाऊ दिनेश, दाजी भरत साहेबराव पाटील (सर्व रा.पाचोरा) हे कारने जात होते. कार रांजणगाव फाट्याजवळ आली असता गाडीला अवजड वस्तू लागून इंजिनमधून धूर येऊ लागल्याने चालकाने वाहन थांबविले. एवढ्यात समोरून सात ते आठ संशयीत हातात काठ्या घेऊन गाडीकडे पळत-पळत येताना दिसले. त्यातील एक जण कारमधील लोकांच्या अंगावर धावून आला आणि कारमधील सर्वाच्या हातातील सोन्याच्या अंगठ्या, रोकड, लॅपटॉप व मोबाइल हँडसेट मिळून एक लाख 20 हजार रुपयांचा ऐवज काढून घेतला आणि तेथून ते सर्वजण पसार झाले.
दरोड्याची माहिती संबंधितांनी चाळीसगाव ग्रामीण पोलिसांना दिली. सायंकाळी ग्रामीण पोलिसांत फिर्याद दाखल करण्यात आली. डॉक्टर दाम्पत्याला लुटण्यापूर्वी पहाटे चार वाजता याच फाट्यावर सुरेश गोविंदा नागरगोजे (रा. रेणापूर जि. लातूर) यांच्याही वाहनाला काहीतरी लागल्याचा आवाज आला मात्र काही लोक आपल्या गाडीकडे येत असल्याचे दिसताच ते तत्काळ गाडीत बसून तेथून निघून आले असेही फिर्यादीत नमूद आहे.
