चोपडा शहर पोलिसांची मोठी कारवाई : मोठ्या दरोड्यापूर्वीच सात गुन्हेगार कारवाईच्या पिंजर्‍यात
गावठी पिस्तूल, तलवारी जप्त : नांदेड, संभाजीनगरसह स्थानिक गुन्हेगारांचा समावेश
Chopra City Police’s major operation: Seven criminals in the cage of action even before the big robbery चोपडा (28 ऑक्टोबर 2025) : चोपडा शहर पोलिसांनी दरोड्याचा मोठा डाव उधळत सात दरोडेखोरांना अटक केली. आरोपींकडून गावठी पिस्तूल, तलवारी आणि 13 लाख 10 हजार रुपये किंमतीचा मुद्देमाल जप्त करण्यात आल्याची माहिती पोलिस अधीक्षक महेश्वर रेड्डी यांनी सोमवारख 27 ऑक्टोबर रोजी सायंकाळी सहा वाजता पत्रपरिषदेत दिली.
असे आहे प्रकरण ?
27 ऑक्टोबर रोजी मध्यरात्री 2.30 वाजेच्या सुमारास चोपडा शहर पोलिस निरीक्षक मधुकर साळवे यांना शिरपूर बायपास रोडवर एका पांढर्‍या रंगाच्या कारमध्ये काही संशयित व्यक्ती थांबले असल्याची गोपनीय माहिती मिळाली. त्यानुसार तात्काळ पोलिस पथक तयार करून रणगाडा चौकाच्या पुढे, बायपास रोडवर पांढर्‍या रंगाची स्वीफ्ट डिझायर कार (क्र. एम.एच.26 सी.एच.1733) थांबलेली आढळली. कारच्या बाहेर दोघे लक्ष ठेवून उभे असलेले आणि आतमध्ये पाच जण बसलेले, असे एकूण सात संशयित पोलिसांना आढळले. पोलिसांना पाहून त्यांनी पळून जाण्याचा प्रयत्न केला मात्र पोलिसांनी तात्काळ घेराव घालून सातही आरोपींचा पाठलाग करून त्यांना अटक केली आहे.
गावठी पिस्टलसह तलवारी जप्त
झडतीदरम्यान, दोन संशयित आरोपींच्या कमरेला लोड केलेले गावठी कट्टे, गाडीत दोन तलवारी आणि एक रिकामे मॅगझीन मिळून आले. अटक करण्यात आलेल्यांमध्ये दिलीपसिंह पवार, विक्रम बोरगे, अनिकेत सूर्यवंशी, अमनदीपसिंग राठोड, सद्दाम हुसेन (सर्व रा. नांदेड, संभाजीनगर) आणि चोपडा येथील अक्षय महाले व जवेश महाजन या सात गुन्हेगारांचा समावेश आहे.
चौकशीत या आरोपींवर यापूर्वी नांदेड, संभाजीनगर (वैजापूर) आणि चोपडा येथे खून, खुनाचा प्रयत्न, दरोडा, जबरी चोरी, दंगल, दहशत माजविणे आणि अग्निशस्त्रे बाळगणे यासारखे गंभीर गुन्हे दाखल असल्याचे निष्पन्न झाले. आरोपींपैकी दोघे नुकतेच एमपीडीए कायद्यान्वये स्थानबध्दतेतून बाहेर आले आहेत तर एक आरोपी दरोड्याच्या गुन्ह्यात पसार होता.
नांदेड परिसरात मोठी दशहत
या आरोपींची नांदेड परिसरात मोठी दहशत असून, ते शस्त्रांचा धाक दाखवून खंडणी वसूल करणे, खंडणीसाठी अपहरण करणे आणि लोकांचा छळ करून त्यांचे व्हिडिओ तयार करून धमकी देणे अशी कृत्ये करत असल्याचे तपासात उघड झाले. या आरोपींविरुद्ध चोपडा शहर पोलीस ठाण्यात गुन्हा दाखल करण्यात आला.
यांनी केली कारवाई
ही कारवाई जळगाव पोलीस अधीक्षक महेश्वर रेड्डी, अपर पोलिीस अधीक्षक कविता नेरकर, उपविभागीय पोलिस अधिकारी अण्णासाहेब घोलप यांच्या मार्गदर्शनाखाली पोलिस निरीक्षक मधुकर साळवे व पथकातील एपीआय एकनाथ भिसे, हवालदार हर्षल पाटील, हवालदार संतोष पारधी, हवालदार ज्ञानेश्वर जयागे, कॉन्स्टेबल अमोल पवार, कॉन्स्टेबल मदन पावरा, कॉन्स्टेबल रवींद्र मंदे, कॉन्स्टेबल विनोद पाटील, चालक हवालदार किरण धनगर, कॉन्स्टेबल योगेश पाटील, कॉन्स्टेबल प्रकाश ठाकरे आदींच्या पथकाने केली.
