Ghanshyam Mahajan elected as Jalgaon District NSUI President सावदा (29 ऑक्टोबर 2025) : सावदा शहरातील तरुण उद्योजक आणि भारतीय राष्ट्रीय काँग्रेसचे निष्ठावंत कार्यकर्ते घनश्याम महाजन यांची भारतीय राष्ट्रीय विद्यार्थी संघटना (एन.एस.यु.आय.) च्या जळगाव जिल्हाध्यक्षपदी निवड करण्यात आली. राज्याध्यक्ष सागर साळुंखे आणि राज्य प्रभारी अक्षय यादव यांच्या जळगाव जिल्हा दौर्‍यानंतर नियुक्ती अधिकृतपणे जाहीर करण्यात आली.
तळागाळातील समर्पित कार्यकर्ते
घनश्याम महाजन हे रावेर तालुक्यातील तळागाळातील समर्पित आणि कार्यक्षम काँग्रेस कार्यकर्ते म्हणून ओळखले जातात. त्यांचे वडील होतकरू शेतकरी तर आजोबा रेल्वे सेवेत कार्यरत होते. आईचे गाव खिरोदा असल्यामुळे, त्यांच्या कुटुंबावर गांधीवादी आणि पुरोगामी विचारसरणीचा ठसा उमटलेला आहे. गावपातळीवर त्यांचा परिवार लोकसेवक मधुकरराव चौधरी यांच्या सहकार्‍यांपैकी एक म्हणूनही प्रसिद्ध आहे.
अलीकडच्या काळात त्यांनी जळगाव जिल्ह्यातील विद्यार्थी आंदोलन पुन्हा सक्रिय करण्यासाठी महत्त्वपूर्ण भूमिका निभावली आहे. त्यांच्या पुढाकारामुळे गेल्या दशकभरापासून निष्क्रिय असलेली एन.एस.यु.आय. संघटना नवचैतन्याने जिल्ह्यात कार्यरत झाली असून, विद्यार्थ्यांमध्ये संघटनेबद्दल नव्या विश्वासाची भावना निर्माण झाली आहे.
या नियुक्तीकडे काँग्रेस पक्षाच्या सामाजिक संतुलन आणि सर्वसमावेशक प्रतिनिधित्वाच्या प्रयत्नांचा एक महत्त्वपूर्ण टप्पा म्हणून पाहिले जात आहे. लेवा पाटीदार समाजातील अनेक नेत्यांनी पूर्वी काँग्रेसला आपले नेतृत्व दिले असले, तरी अलीकडच्या काळात या समाजाला जिल्हा स्तरावर प्रतिनिधित्वाची मर्यादित संधी मिळाली होती. घनश्याम महाजन यांच्या निवडीद्वारे काँग्रेसने सर्व समाजघटकांना न्याय देण्याचा आणि युवकांमध्ये नवसंजीवनी निर्माण करण्याचा प्रयत्न केल्याचे स्पष्ट होते.
