Major action by Jalgaon MIDC police: Villagers arrested along with Katta, Koyata जळगाव (29 ऑक्टोबर 2025) : दहशत माजवण्याच्या उद्देशाने घातक शस्त्रे बाळगून फिरत असलेल्या या त्रिकुटाकडून गावठी बनावटीचा कट्टा, जिवंत काडतूस आणि धारदार कोयता जप्त करण्यात आला. जळगाव एमआयडीसी पोलिसांनी गोपनीय माहितीच्या आधारे ही कारवाई केली.
गोपनीय माहितीवरून कारवाई
जळगाव शहर कांचन नगर परिसरात राहणारा सराईत गुन्हेगार तेजस दिलीप सोनवणे (25) याला उपविभागीय दंडाधिकारी यांच्या आदेशानुसार दोन वर्षांसाठी जळगाव जिल्ह्यातून हद्दपार केले आहे. हद्दपारीचा आदेश धुडकावून तेजस सोनवणे त्याच्या साथीदारांसह घातक हत्यारे घेऊन नेहरू नगर परिसरात फिरत असल्याची गुप्त माहिती शनिवार, 25 ऑक्टोबर 2025 रोजी एमआयडीसी निरीक्षक बबन आव्हाड यांना मिळाली.
त्यांनी गुन्हे शोध पथकाचे पोलिस उपनिरीक्षक राहुल तायडे यांच्या नेतृत्वाखाली पथक तयार केले. या पथकात एएसआय विजयसिंग पाटील, हवालदार गणेश शिरसाळे, हवालदार प्रमोद लाडवंजारी, हवालदार किरण चौधरी, गणेश ठाकरे, किरण पाटील, नितीन ठाकुर, राहुल घेटे, योगेश घुगे यांचा समावेश होता.
या पथकाने तत्काळ शिरसोली रोडवरील नेहरू नगर भागातील संदीपनी बॉईज हॉस्टेल परिसरात सापळा रचला. संशयास्पद हालचाल करणार्‍या तिघांना ताब्यात घेऊन त्यांची चौकशी केली. त्यांनी त्यांची नावे तेजस दिलीप सोनवणे (25, रा.कांचन नगर, जळगाव), खुशाल पितांबर सोनार (21, रा.पार्वताबाई ओकनगर, कांचन नगर, जळगाव) आणि चेतन पितांबर सोनार (23, रा.पार्वताबाई ओकनगर, कांचन नगर, जळगाव) अशी सांगितली.
झडतीत घातक शस्त्र जप्त
झडतीदरम्यान, हद्दपार तेजस सोनवणे आढळला तर त्याचा साथीदार खुशाल सोनार याच्याकडे एक गावठी बनावटीचा कट्टा आणि एक जिवंत काडतूस मिळून आले. तिसरा आरोपी चेतन सोनार याच्याकडे धारदार पाते असलेला लोखंडी कोयता आढळून आला. पोलिसांनी तिघांना ताब्यात घेऊन ही घातक शस्त्रे जप्त केली. अटक केलेल्या आरोपींना न्यायालयात हजर केले असता त्यांना तीन दिवसांची पोलिस कोठडी सुनावण्यात आली. तपास पोलिस उपनिरीक्षक राहुल तायडे, चेतन पाटील करीत आहेत.
