Youth from Chopda taluka killed after being hit by speeding truck अडावद, ता.चोपडा (30 ऑक्टोबर 2025) : भरधाव ट्रकने दुचाकीला उडवल्याने चोपडा तालुक्यातील 19 वर्षीय दुचाकीस्वार जागीच ठार झाला. हा अपघात गुरुवार, 30 रोजी दुपारी तीन वाजेच्या सुमारास वडगाव-चांदसणी रस्त्यावर येथील पशु वैद्यकीय दवाखान्यासमोर घडला. आकाश ज्ञानेश्वर पाटील असे ठार झालेल्या युवकाचे नाव आहे.
काय घडले युवकासोबत ?
वडगाव-चांदसणी रस्त्यावरुन आर.जे.40 जी.ए.4196 क्रमांकाची ट्रक महामार्गावर भरधाव वेगाने जात असताना महामार्गावरुन प्लॉट भागाकडे जाणार्या मोटारसायकल क्रमांक (एम.एच.19 एन.5979) वरील आकाश ज्ञानेश्वर पाटील ला ट्रकने अडावद पशु वैद्यकीय दवाखान्यासमोर जबर धडक दिली.
जबर धडकेने आकाशचा जागीच मृत्यू झाला. आजूबाजूला रस्ता वापरणार्या इतरांनी आरडाओरड केल्याने ट्रकचालक ट्रक सोडून पसार झाला. हा अपघात इतका भीषण होता की, युवकाच्या डोक्याचा अक्षरशः चेंदामेंदा झाला.
अपघाताची माहिती मिळताच अडावदचे हवालदार सुनील तायडे, शेषराव तोरे, किरण शिरसाठ, फिरोज तडवी, भूषण चव्हाण, प्रदीप पाटील, जयदीप राजपूत, विजय बच्छाव, अक्षय पाटील, दिलीप पाटील यांनी घटनास्थळी धाव घेतली.
