Old dispute erupts among inmates in Jalgaon Jail: Prisoner seriously injured in beating by quartet जळगाव (30 ऑक्टोबर 2025) : जळगाव जिल्हा कारागृहात बंद्यांमध्ये हाणामारीची घटना नवीन नाही. त्यातच पुन्हा कैद्यांमध्ये जुन्या वादातून एकावर हल्ला करण्यात आल्याची घटना बुधवार, 29 ऑक्टोबर रोजी दुपारी चार वाजता घडली. या घटनेने पुन्हा कैद्यांच्या सुरक्षेचा प्रश्न समोर आला आहे.
काय घडले नेमके?
तेजस दिलीप सोनवणे (25, रा.कांचन नगर, जळगाव) हा एका गुन्ह्यात जिल्हा कारागृहात बंदी आहे. बुधवारी दुपारी चार वाजेच्या सुमारास तेजस सोनवणे बॅरेक दोनमध्ये झोपला असताना याच कारागृहातील चार बंदींनी त्याला घेरले. आरोपी बंदींमध्ये पराग रवींद्र आरखे, बबलू उर्फ विशाल राजू गागले, भूषण विजय माळी उर्फ भाचा आणि सचिन कैलास चव्हाण यांचा समावेश होता. या चौघांनी तेजसला शिवीगाळ करण्यास सुरुवात केली.
तेजसने शिवीगाळ करण्याचे कारण विचारले असता, आरोपींनी तू भूषण माळी उर्फ भाचा याचा विरोधक आहेस, तू त्याचे नादी लागतो का? असे धमकावले. यानंतर चौघांनी तेजसला शिवीगाळ करत, त्याच्या डोक्याच्या मागील बाजूस काहीतरी टणक वस्तूने वार करून गंभीर जखमी केले. एवढेच नव्हे, तर त्याला जीवे ठार मारण्याची धमकीही दिली.
हा सर्व प्रकार सुरू असतानाच, कर्तव्यावर असलेल्या जेल शिपायांनी धाव घेऊन मध्यस्थी केली आणि भांडण सोडवले. या मारहाणीत जखमी झालेल्या तेजस सोनवणे याला तातडीने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले. या गंभीर घटनेनंतर रात्री 9.30 वाजता जखमी तेजस सोनवणे याच्या तक्रारीवरून जिल्हापेठ पोलिसात आरोपी पराग आरखे, बबलू गागले, भूषण माळी उर्फ भाचा आणि सचिन चव्हाण या चार बंदींविरुद्ध गुन्हा दाखल करण्यात आला.
