भुसावळातील 25 लाखांच्या दरोड्याची उकल : ‘चालक मास्टरमाईंड’ ; सहा आरोपी गुन्हे शाखेच्या जाळ्यात
25 lakh robbery solved in Bhusawal: ‘Driver is mastermind’; Six accused in the net of Crime Branch भुसावळ (31 ऑक्टोबर 2025) : भुसावळातील बांधकाम व्यावसायीक हाजी मुन्ना तेली यांच्याकडील अकाऊंटंट यासीन शेख यांच्या हातातील 25 लाख 42 हजारांची रोकड सिनेस्टाईल लुटण्यात आल्याची घटना मंगळवार, 28 रोजी रात्री 10.20 वाजता सत्यसाई नगराजवळ घडली होती. या प्रकरणी भुसावळ तालुका पोलिसात गुन्ह दाखल करण्यात आल्यानंतर समांतर तपासात या गुन्ह्यामागे तेली यांच्याकडे कामाला असलेला चालकच मास्टरमाईंड असल्याची व त्यानेच रोकडबाबत टीप दिल्याची माहिती तपासात समोर आल्यानंतर या गुन्ह्यात सहा आरोपींना बेड्या ठोकण्यात आल्या असून त्यांच्याकडून 23 लाख 42 हजारांची रोकड जप्त करण्यात आली असल्याची माहिती जळगाव पोलिस अधीक्षक डॉ.महेश्वर रेड्डी यांनी शुक्रवारी सायंकाळी पत्रकार परिषदेत दिली.
चालकाने दिली कॅश वाहतुकीची माहिती
भुसावळातील बांधकाम व्यावसायीक हाजी मुन्ना तेली यांच्याकडे मोहम्मद यासीन ईस्माईल हे गेल्या अनेक वर्षांपासून अकाउंटचे काम पाहतात व दिवसभराची रोकड बँकेत जमा केल्यानंतर सायंकाळी उशिरा आलेली रोकड ते घरी घेवून दुसर्‍या दिवशी बँकेत जमा करतात. हा त्यांचा नित्यक्रम तेली यांच्याकडे चालक म्हणून असलेले शाहीद बेग यांना ठाऊक असल्याने त्यांनी रोकड बळकावण्यासाठी प्लॅन आखला व याबाबतची माहिती साथीदार मुजाहिद मलीक आणि मोहम्मद दानिश यांना दिली. मुजाहिदने हा प्लॅन रावेर तालुक्यातील रसलपूर येथील अजहर फरीद मलक, युनुस खान आणि ईजहार बेग इरफान बेग यांना सांगितला. घटनेच्या रात्री या तिघांनी प्रत्यक्ष घटनास्थळी जाऊन लुटीचा गुन्हा केला.
धक्का देत लांबवली पिशवी
मंगळवारी रात्री हिशोब आटोपून मोहम्मद यासीन ईस्माईल हे दुचाकीवर रोकड असलेली पिशवी घेवून घराकडे निघाल्यानंतर दबा धरून बसलेल्या आरोपींनी अचानक त्यांच्या दुचाकीला धडक देत मो.यासीन ईस्माईल यांना खाली पाडत 25 लाख 42 हजारांची रोकड असलेली पिशवी लंपास केली. अंधार्‍यात संशयीत धूम स्टाईल पसार झाले मात्र भुसावळ तालुका पोलिसात या प्रकरणी गुन्हा दाखल झाल्यानंतर गुन्हे शाखेने तक्रारदार तसेच तेली यांच्याकडे कामाला असलेल्या प्रत्येकाची पोलिसी भाषेत चौकशी केल्यानंतर चालकानेच पैश्यांची टीप दिल्याची माहिती समोर आली.
या आरोपींना अटक
मुख्य सूत्रधार व चालक मुजाहिद आसीफ मलिक (20, रा.भुसावळ) शाहीद बेग इब्राहिम बेग (25, रा.भुसावळ), मोहम्मद दानिश मोहम्मद हाशीम (19, रा.भुसावळ), अजहर फरीद मलक (24, रा.रसलपूर, ता.रावेर), अमीर खान युनूस खान (24, रा.रसलपूर, ता.रावेर), ईजहार बेग इरफान बेग (वय 23, रा. रसलपूर, ता. रावेर) अशी अटकेतील आरोपींची नावे आहेत. आरोपी शाहीद बेग याच्यावर मलकापूर शहर, बोराखेडी आणि मलकापूर ग्रामीण पोलीस ठाण्यात केबल चोरीचे गुन्हे दाखल असून आरोपी अमीर खान याच्यावर रावेर पोलीस ठाण्यात चोरीचा गुन्हा दाखल आहे. दरम्यान, अटकेतील आरोपींना 03 नोव्हेंबरपर्यंत पोलिस मंजूर असून तपास पोलिस निरीक्षक महेश गायकवाड करीत आहेत.
यांनी उघडकीस आणला गुन्हा
भुसावळ पोलिस उपअधीक्षक संदीप गावीत, गुन्हे शाखेचे पोलिस निरीक्षक राहुल गायकवाड, बाजारपेठ निरीक्षक राहुल वाघ, तालुका निरीक्षक श्री. महेश गायकवाड यांच्या मार्गदर्शनाखाली ग्रेडेड उपनिरीक्षक रवी नरवाडे, हवालदार गोपाल गव्हाळे, हवालदार उमाकांत पाटील, हवालदार प्रेमचंद सपकाळे, नाईक श्रीकृष्ण देशमुख, नाईक विकास सातदिवे, कॉन्स्टेबल प्रशांत परदेशी, कॉन्स्टेबल राहुल वानखेडे, कॉन्स्टेबलईश्वर पाटील, चालक दर्शन ढाकणे तसेच भुसावळ तालुका उपनिरीक्षक पूजा अंधारे, संजय तायडे, हवालदार वाल्मीक सोनवणे, हवालदार सुधीर विसपुते, हवालदार जितु यवने तसेच बाजारपेठचे कॉन्स्टेबल योगेश माळी, कॉन्स्टेबल भूषण चौधरी, कॉन्स्टेबल अमर अढाळे, कॉन्स्टेबल प्रशांत सोनार, रावेरचे कॉन्स्टेबल प्रमोद पाटील आदींच्या पथकाने आरोपींच्या मुसक्या बांधल्या.
