महाराष्ट्र केसरी व आंतरराष्ट्रीय कुस्तीपटू सिकंदर शेखला पंजाब पोलिसांकडून अटक : समोर आले ‘धक्कादायक’ कारण

शस्त्र व काडतूस जप्त
पोलिसांनी आरोपींकडून एक लाख 99 हजारांची रोकड, पाच पिस्टल. काही काडतुसे आणि स्कॉर्पिओ-एन व एक्सयूव्ही अशा दोन गाड्या जप्त केल्या आहेत. या प्रकरणी पंजाबमधील खरड येथील पोलिस ठाण्यात आर्म्स अ‍ॅक्टअंतर्गत गुन्हा दाखल करण्यात आला.

दानवीरवर खून अन् दरोड्याचे गुन्हे
मुख्य आरोपी दानवीरवर हरियाणा, उत्तर प्रदेश आणि राजस्थानमध्ये खून, दरोडा, एटीएम फोडणे, आर्म्स अ‍ॅक्टसह अनेक गंभीर गुन्हे दाखल आहेत. तो पपला गुर्जर गँगचा सक्रिय सदस्य असून उत्तर प्रदेश आणि मध्य प्रदेशातून शस्त्रं आणून पंजाबमध्ये विकण्याचे काम करायचा.

24 ऑक्टोबर रोजी दानवीर आणि त्याचा साथीदार बंटी एक्सयूव्ही गाडीतून दोन पिस्तुलं घेऊन मोहालीत आले होते. ही शस्त्रं ते सिकंदर शेखकडे देणार होते, तर सिकंदरने ती नयागावच्या कृष्ण उर्फ हॅप्पीला देण्याचा प्लॅन केला होता. पोलिसांनी एअरपोर्ट चौकातून तिघांना पकडले आणि मिळालेल्या माहितीनुसार 26 ऑक्टोबर रोजी कृष्ण कुमार उर्फ हॅप्पीलाही अटक करण्यात आली. त्याच्याकडून आणखी तीन पिस्तुलं जप्त करण्यात आली.

महाराष्ट्र केसरी ते शस्त्र तस्करी
सिकंदर शेख हा आंतरराष्ट्रीय दर्जाचा कुस्तीपटू असून त्याने आर्मीमध्ये क्रीडा कोट्यातून भरती घेतली होती मात्र काही काळानंतर त्याने नोकरी सोडली. तो बीए पदवीधर असून विवाहित आहे. गेल्या पाच महिन्यांपासून तो पंजाबमधील मुल्लांपुर गरीबदास येथे भाड्याच्या घरात राहत होता. पोलिसांच्या माहितीनुसार, तो शस्त्र तस्करी साखळीत मध्यस्थाची भूमिका बजावत होता.