धुळे जिल्ह्यात ‘मसल पॉवर’ चा वापर केल्यास खबरदार ! ; निवडणुकीपूर्वीच कारवाईचे फटाके
Beware of using ‘muscle power’ in Dhule district ! ; Crackers of action before the elections धुळे (3 नोव्हेंबर 2025) : आगामी आठवडेभरात स्थानिक स्वराज्य संस्थेसह जिल्हा परिषद व पंचायत समिती निवडणुकांसाठी आचारसंहिता जाहीर होणार असून लवकरच निवडणुकादेखील होणार आहेत. या निवडणुकीत मतदारांवर प्रभाव व दहशत निर्माण करण्यासाठी पहेलवान, जीममधील बाऊन्सर व बॉडीबिल्डर यांचा काहींकडून वापर केला जातो मात्र या कृतीने समाजात दहशत निर्माण झाल्यास तसेच गुंड प्रवृत्तींसोबत राहून शक्ती प्रदर्शन केल्यास अशांवर पोलिस प्रशासनातर्फे कठोर कारवाई करण्यात येईल, असा इशारा धुळे जिल्हा पोलिस प्रशासनातर्फे जिल्हा पोलिस अधीक्षक श्रीकांत धीवरे यांनी दिला आहे.
या संदर्भात त्यांच्या अखत्यारीतील 17 पोलिस ठाण्यांच्या प्रभारींना निर्देश दिल्यानंतर प्रत्येक प्रभारींनी आपापल्या हद्दीतील बॉडी बिल्डर तसेच बाऊन्सर यांना बोलावून कडक सूचना दिल्या.
कायद्यात रहाल तर फायद्याल रहा : पोलिस निरीक्षक समाधान वाघ
धुळ्यातील देवपूर पोलिस ठाण्याचे प्रभारी निरीक्षक समाधान वाघ यांनी संबंधितांची बैठक घेत त्यांना कडक शब्दात सूचना केल्या. समाजात दहशत निर्माण करणारी कोणतीही हालचाल किंवा कृती करू नये, गुंड तसेच समाजकंटक यांच्यासोबत राहून शक्ती प्रदर्शन करू नये, सार्वजनिक ठिकाणी अयोग्य वर्तन, दडपशाही करणारी वक्तव्ये किंवा वागणूक टाळावी तसेच अवैध बॅनर, पोस्टर किंवा इतर माध्यमांद्वारे दडपण आणण्याचा प्रयत्न करू नये, अशा सूचना निरीक्षक वाघ यांनी यावेळी दिल्या.
भारतीय न्याय प्रक्रिया संहितेतील कलम 178 बीएनएस नुसार संबंधित व्यक्तींना नोटिसा देण्यात आल्या. नियमभंग करणार्यांवर कठोर कारवाई केली जाईल, असा इशारा पोलिसांनी यावेळी दिला.
