दोन कोटींची लाच मागितली : दिड लाखांच्या खर्‍या व 45 लाखांच्या नकली नोटा स्वीकारताच पुण्यात फौजदाराला पडल्या बेड्या
Demanded a bribe of two crores: Police officer in Pune was arrested after accepting genuine notes worth one and a half lakhs and fake notes worth 45 lakhs पुणे (3 नोव्हेंबर 2025) : पिंपरी चिंचवड पोलिस आयुक्तालयातील आर्थिक गुन्हे शाखेत कार्यरत पोलिस उपनिरीक्षक प्रमोद चिंतामणी याला 46 लाख 50 हजारांची लाच स्वीकारताना एसीबीने अटक केली होती. विशेष म्हणजे आरोपीने तब्बल दोन कोटी रुपयांची लाच मागितल्यानंतर पहिल्या हप्त्यापोटी 50 लाख स्वीकारण्याची तयारी दर्शवली. यावेळी एसीबीने तक्रारदाराकडे दिड लाखांच्या खर्‍या नोटांसोबत 45 लाखांच्या नकली नोटा देत सापळा रचला व लाच स्वीकारताच पोलिस उपनिरीक्षकाला अटक केली.
असे आहे लाच प्रकरण
तक्रारदार हे व्यवसायाने वकील आहेत. त्यांच्या आशिलाविरुद्ध बावधन पोलिसात गुन्हा दाखल असून या गुन्ह्यात आशिलाच्या वडिलांनाही अटक झाली असून ते न्यायालयीन कोठडीत आहेत. संबंधित गुन्ह्याचा तपास पिंपरी चिंचवड आयुक्तालयातील आर्थिक गुन्हे शाखेचा उपनिरीक्षक प्रमोद चिंतामणीकडे आहे.
तक्रारदाराच्या आशिलाला मदत करण्यासाठी तसेच अटकेत असलेल्या वडिलांच्या जामीन प्रक्रियेत सहकार्य करण्याच्या मोबदल्यात त्या उपनिरीक्षकाने दोन कोटींची लाच मागितली व एसीबीकडे तक्रार करण्यात आली. एसीबीने लाच पडताळणी केली असता आरोपी उपनिरीक्षकाने दोन कोटींपैकी एक कोटी रुपये स्वतःसाठी आणि उर्वरित एक कोटी त्याच्या वरिष्ठ पोलिस निरीक्षकासाठी मागितल्याचे निष्पन्न झाले. त्यानंतर तक्रारदाराने 50 लाख रुपयांचा पहिला हप्ता देण्याचे ठरवले होते.
आरोपीला 6 पर्यंत कोठडी
लाचलुचपत विभागाने सापळा रचून आरोपी उपनिरीक्षक प्रमोद चिंतामणी याला तक्रारदाराकडून 46 लाख 50 हजार रुपयांची लाच स्वीकारताच रंगेहात पकडले. ही कारवाई उंटाड्या मारोती मंदिरासमोर, रस्ता पेठ, पुणे शहर येथे 2 रोजी करण्यात आली. फौजदाराकडून लाच रक्कम (त्यापैकी 1.5 लाख रुपयाच्या खर्‍या आणि उर्वरित 45 लाख रुपयांच्या खेळण्यांच्या नोटा), दोन मोबाइल फोन आणि रोख रक्कम मिळून एकूण 46.53 लाखांचा मुद्देमाल जप्त करण्यात आला. आरोपी फौजदाराला न्यायालयाने 6 नोव्हेंबरपर्यंत पोलिस कोठडी सुनावली आहे.
