यावल नगरपालिका निवडणूक : काँग्रेसकडून इच्छुकांच्या अर्ज स्वीकारण्यास सुरूवात
नगराध्यक्ष पदासाठी विशाखा करांडेंचे नाव निश्चित : अनेकांकडून पहिल्या दिवशी अर्ज सादर
Yaval Municipality Election: Congress starts accepting applications from aspirants यावल (4 नोव्हेंबर 2025) : आगामी नगरपालिकेच्या सार्वत्रिक निवडणुकीकरिता भारतीय राष्ट्रीय काँग्रेसच्या वतीने पक्ष कार्यालयामध्ये इच्छुक उमेदवारांच्या अर्ज स्वीकृतीला सुरुवात झाली. शहराध्यक्ष यांच्याकडे या ठिकाणी इच्छुकांनी पहिल्या दिवशी मोठ्या संख्येत अर्ज करण्यासाठी गर्दी केली. नगराध्यक्ष पदासाठी काँग्रेसकडून एकमेव विशाखा राजेश करांडे यांच्या अर्ज आला असून त्यांच्याच नावावर शिक्कामार्फ होण्याचे स्पष्ट संकेत पक्षाच्या पदाधिकार्‍यांनी दिले. बुधवारपर्यंत इच्छुकांना अर्ज सादर करता येणार आहेत.
इच्छुकांची गर्दी
आगामी नगरपालिका सार्वत्रिक निवडणुकीकरिता काँग्रेसच्या पक्ष कार्यालयात शहराध्यक्ष मोहम्मद हकीम मोहम्मद याकूब यांच्याकडे इच्छुकांचे अर्ज स्वीकारणे सुरू झाले आहे. सोमवारपासून पक्ष कार्यालयात अर्ज स्वीकारण्याला सुरुवात करण्यात आली. याप्रसंगी तालुकाध्यक्ष शेखर पाटील, माजी उपनगराध्यक्ष शेख असलम शेख नबी, अनिल जंजाळे, मनोहर सोनवणे, उमर अली कच्छी, अजहर खाटीक, हाजी फारुख शेख, गुलाम गौस, समीर मोमीन सह आदींची उपस्थिती होती. पहिल्याच पक्ष कार्यालयामध्ये विविध प्रभागातून 27 अर्ज प्राप्त झाले. नगराध्यक्ष पदासाठी एकमेव विशाखा राजेश करांडे यांचा अर्ज आहे. दरम्यान, सर्वानुमते काँग्रेसच्या वतीने विशाखा करांडे याचं काँग्रेसच्या अधिकृत उमेदवार असतील, असे काँग्रेस पक्षश्रेष्ठींकडून जवळपास निश्चित आहे.
बुधवारपर्यंत इच्छुकांचे अर्ज स्वीकारले जाणार
यावल शहरातील काँग्रेसच्या पक्ष कार्यालयामध्ये बुधवार, 5 नोव्हेंबर पर्यंत इच्छुक उमेदवारांचे प्रभाग निहाय अर्ज स्वीकारले जाणार आहे. व अर्ज स्वीकारल्यानंतर प्राप्त झालेल्या अर्जा संदर्भात पक्षश्रेष्ठी द्वारे इच्छुकांच्या मुलाखतीदेखील घेतल्या जातील व त्यानंतर उमेदवार निश्चित केले जातील. नगराध्यक्ष पदासाठी एकमेव नावाची जवळपास घोषणा काँग्रेसकडून करण्यात आल्याचे सध्यातरी दिसत आहे.
महाआघाडीनंतर निर्णय
महाविकास आघाडीत शिवसेना उद्धव बाळासाहेब ठाकरे गट व राष्ट्रवादी शरदचंद्र पवार गट यांच्यासोबत चर्चा झाली. दरम्यान सक्षम उमेदवार महाविकास आघाडीकडून देण्याचा निर्णय आहे. महाविकास आघाडीचा निर्णय अद्यापही स्पष्ट झालेला नसला तरी लवकरच या संदर्भात निर्णय होईल, असे प्रसंगी काँग्रेसचे तालुकाध्यक्ष शेखर सोपान पाटील व शहराध्यक्ष मो.हकीम यांनी सांगितले.
