मराठी माझी आई आहे तर उत्तर भारत माझी मावशी ! शिंदे गटाच्या आमदाराच्या वादग्रस्त विधानाने संताप
Marathi is my mother and North India is my aunt! Shinde faction MLA’s controversial statement angers मुंबई (4 नोव्हेंबर 2025) : ‘मराठी माझी आई आहे, तर उत्तर भारत माझी मावशी. एक वेळ आई मेली तरी चालेल, पण मावशी जगली पाहिजे,’ असे वादग्रस्त विधान ठाण्याचे शिंदे गटाचे आमदार प्रकाश सुर्वे यांनी उत्तर भारतीयांच्या कार्यक्रमात सोमवारी केले. मराठी भाषेसंदर्भातील वादग्रस्त विधानानंतर त्यांच्यावर चोहोबाजूंनी टीकेची झोड उठली. शिवसेना उद्धव बाळासाहेब ठाकरे पक्ष आणि मनसेकडून त्यांच्यावर जोरदार टीका झाल्यानंतर सुर्वे यांनी तातडीने हात जोडून माफी मागून या वादावर पडदा टाकण्याचा प्रयत्न केला आहे.
वाद चिघळताच सुर्वे यांनी आपल्या शब्दांची कबुली देत दिलगिरी व्यक्त केली. मराठी माझी मायमावली आहे. अनावधनाने माझ्याकडून तो शब्द बाहेर पडल्याची सरावासारव त्यांनी केली. कुणाच्या भावना दुखावल्या असतील तर आपण दिलगिरी व्यक्त करतो, असे म्हणत सुर्वे यांनी हात जोडून माफी मागितली.
मनसे नेते नयन कदम यांनी प्रकाश सुर्वे यांचा व्हिडिओ शेअर करत त्यांच्यावर टीका केली आहे. ते म्हणाले, मराठी माणसाने हा आमदार निवडून दिला आहे का? मराठी मेली तरी चालेल स्वतःच्या आईला मारून यूपीची मावशी जगवतो हा, याचा जाहीर निषेध, असे म्हणत नयन कदम यांनी तीव्र निषेध नोंदवला.
प्रकाश सुर्वे यांनी मतांच्या लाचारीसाठी असे वक्तव्य केल्याचा आरोप विरोधकांनी केला. ठाकरे गटाच्या नेत्या किशोरी पेडणेकर यांनी सुर्वे यांच्यावर निशाणा साधला. 2022 मध्ये आईलाच (मूळ शिवसेनेला) नमस्कार करून ते बाहेर पडले. त्यांना आई आणि माता यातील फरक तरी कळतो का? असा संतप्त सवाल पेडणेकर यांनी केला.
वादावर शिंदे गटाचे मंत्री उदय सामंत यांनी पडद्यामागून सुर्वे यांची बाजू सांभाळण्याचा प्रयत्न केला. मंत्री सामंत म्हणाले की, आमदार सुर्वे यांच्याकडून चुकून हा शब्द बाहेर पडला असून, त्यांनी त्याबद्दल दिलगिरी व्यक्त केली परंतु काही लोक त्यांच्या वक्तव्याचा आधार घेत राजकीय पोळी भाजण्याचे काम करत आहेत. एकनाथ शिंदे यांच्या नेतृत्वात मराठी भाषेसाठी आम्ही कटिबद्ध आहोत आणि मराठी भाषेला अभिजात भाषेचा दर्जा मिळवून देण्यासाठी काम करत आहोत, असे स्पष्टीकरण सामंत यांनी दिले.
