Youth from UP killed, another critically injured in firing by illegal liquor vendor in Jalgaon जळगाव (4 नोव्हेंबर 2025) : अवैधरित्या दारू विक्री करणार्‍या विक्रेत्याने केलेल्या गोळीबारात एमआयडीसीत काम करणारा युपीतील तरुण ठार झाला तर दुसरा सहकारी गंभीर जखमी झाला. ही धक्कादायक घटना रविवार, 2 नोव्हेंबर रोजी रात्री 10.15 च्या सुमारास घडली. राजन रबीउल्लाख शेख (24, आझमगड, उत्तरप्रदेश, ह.मु.विजेता कंपनी, जळगाव) असे ठार झालेल्या तरुणाचे नाव आहे तर फिरोज अहमद युसूफ शेख (19) जखमी झाला आहे. संशयीत राहुल रामचंद्र बर्‍हाटे व मोनाली राहुल बर्‍हाटे (रामेश्वर कॉलनी, जळगाव) अशी गुन्हा दाखल झालेल्या संशयीतांची नावे आहेत.
काय घडले जळगावात
मूळचे उत्तरप्रदेशातील रहिवासी राजन रबीउल्लाख शेख, फिरोज अहमद युसूफ शेख व इतर मित्र एमआयडीसीतील विजेता कंपनीत काम करतात. पानटपरी चालक राहुल बर्‍हाटे हा वारंवार त्रास देत असल्याच्या तक्रारी असतानाच रविवारी रात्री त्याने कामगार सरफू अहमद याला मारहाण केली. याबाबत कंपनीचे व्यवस्थापक मोहम्मद अफजल जलाऊद्दीन उर्फ सोनू यांना सांगण्यात आले. व्यवस्थापक सोनू यांच्यासह फिरोज, राजन, सरपू सलीम आणि संजय हे सर्व जण राहुलला समजावून सांगण्यासाठी त्याच्या पानटपरीवर गेल्यानंतर राहुलने फोनवर ‘लवकर या, हे सर्व एकत्र आले आहेत,’ असे सांगून इतरांना बोलावले. यावेळी मोनाली राहुल बर्‍हाटे ही कट्टा घेवून आल्यानंतर तिने तो राहुलला दिला व त्याने गोळ्या झाडण्यास सुरुवात केली.
या गोळीबारात राजन शेख व फिरोज अहमद युसूफ शेख हे दोघे गंभीर जखमी झाले व त्यांना तातडीने जिल्हा रुग्णालयात दाखल करण्यात आले. उपचारारम्यान गंभीर जखमी राजन शेख रफिउल्ला याचा मृत्यू ओढवला. तो मूळचा उत्तर प्रदेशातील रहिवासी असून गेल्या तीन वर्षांपासून एमआयडीसीतील विजेता कंपनीत कामाला होता. या गोळीबाराच्या घटनेमुळे एमआयडीसी परिसरात खळबळ उडाली आहे
दोघांविरोधात खुनाचा गुन्हा
फिरोज अहमद युसूफ शेख (19) यांच्या फिर्यादीवरून संशयीत राहुल रामचंद्र बर्‍हाटे व मोनाली राहुल बर्‍हाटे (रामेश्वर कॉलनी, जळगाव) यांच्याविरोधात गुन्हा दाखल करण्यात आला. तपास पोलिस निरीक्षक बबन आव्हाड करीत आहेत.
