भुसावळ पालिका निवडणूक : इच्छूकांचे गुडघ्याला बाशिंग
50 जागांसाठी प्रत्येक प्रभागात चुरशीची होणार निवडणूक : एका जागेसाठी चार ते पाच दावेदार
Bhusawal Municipal Election : Aspirants’ knee bashing भुसावळ (5 नोव्हेंबर 2025) : भुसावळ पालिका निवडणुकीचा बिगुल वाजताच राजकीय व प्रशासकीय स्तरावर हालचालींना वेग आला आहे. डिसेंबर 2021 मध्ये कार्यकाळ संपल्यानंतर 2022 मध्ये प्रशासकीय राजवट लागू झाल्यानंतर आता 2025 मध्ये निवडणुका होत असल्याने इच्छूकांसोबत मतदारांमध्ये प्रचंड उत्सुकता आहे. विशेष शहरातून आता 50 नगरसेवक निवडून येणार असून प्रत्येक प्रभागात यंदा चुरशीची निवडणूक होईल, असा अंदाज आहे.
नगराध्यक्ष पदासाठी प्रचंड चुरस
प्रामुख्याने लोकनियुक्त नगराध्यक्ष पदासाठी कमालीची चुरस राहणार आहे. त्यामुळे विजयाचे गणित जुळवणार्‍या उमेदवारांच्या नावांचा प्रमुख पदाधिकार्‍यांनी आढावा घेतला. तीन वर्षांपासून नगरसेवक पदासाठी गुडघ्याला बाशिंग बांधून असलेल्यांनी पक्षांकडे संपर्क साधून उमेदवारीसाठी चाचपणी केली.
गुरुवारी प्रांतांनी बोलावली बैठक
भुसावळ पालिका निवडणुकीच्या पार्श्वभूमीवर प्रांताधिकारी जितेंद्र पाटील यांनी गुरुवारी सकाळी 11 वाजता प्रांत कार्यालयात अधिकारी व कर्मचार्‍यांची बैठक बोलावली आहे. या बैठकीत आगामी निवडणुकीच्या तयारीवर चर्चा करण्यात येईल. निवडणुकीशी संबंधित विविध प्रक्रियेचा आढावा व पुढील कामांचे नियोजन प्रांत सांगतील. नगरपालिका निवडणुकीसाठी यापूर्वी प्रभाग रचना, अंतिम मतदार यादी प्रसिद्ध झालेली आहे. मतदान केंद्र निश्चिती लवकरच होईल.
