Be careful while investing online! Amalner doctor cheated of Rs 28 lakhs अमळनेर (5 नोव्हेंबर 2025) : ऑनलाईन गुंतवणूक केल्यास अधिक नफा मिळेल, असे आमिष दाखवत अमळनेरातील दंत चिकित्सक डॉ. विकास सोमेश्वर पवार यांना तब्बल 27 लाख 95 हजार 630 रुपयांचा गंडा घालण्यात आला. या प्रकरणी डॉ.पवार यांनी जळगाव सायबर पोलिसात गुन्हा दाखल करण्यात आला.
काय घडले डॉक्टरांसोबत ?
अमळनेरातील मुंदडा नगर परिसरातील रहिवासी व कृष्णा डेंटल क्लिनिकचे डॉ.विकास पवार (48) हे सोशल मीडियावर सक्रिय आहेत. ऑक्टोबर महिन्यात ‘अंकिता देसाई’ नावाच्या महिलेची फेसबुकवरून ओळख झाली. संवाद वाढल्यानंतर तिने स्वतःला ‘ट्रस्ट बुकिंग कस्टमर सर्व्हिस’ या ऑनलाईन गुंतवणूक कंपनीशी जोडलेले असल्याचे सांगून मोठ्या नफ्याचे आमिष दाखवले.
विश्वास बळावताच केली फसवणूक
सुरुवातीला 10 हजार रुपयांची गुंतवणूक केल्यावर अॅपमध्ये 900 रुपयांचा नफा दिसल्याने डॉ.पवार यांचा विश्वास बसला. त्यानंतर त्या महिलेने विविध रिव्ह्यू टास्क पूर्ण करण्यासाठी वेगवेगळ्या खात्यांवर पैसे भरण्यास सांगितले. विश्वासात घेत सातत्याने पैसे भरण्यात आले आणि एकूण रक्कम 27 लाख 95 हजार 630 रुपयांवर पोहोचली. अॅपमध्ये 36 लाखांहून अधिक रक्कम नफ्याच्या स्वरूपात दाखवली गेली, मात्र रक्कम परत घेण्याचा प्रयत्न करताच व्यवहार थांबले.
संशय निर्माण झाल्यावर डॉ.पवार यांनी ‘अंकिता देसाई’शी संपर्क साधला असता तीने उडवा-उडवीची उत्तरे देत आणखी पैशांची मागणी केली. आपली फसवणूक झाल्याचे लक्षात येताच त्यांनी तत्काळ सायबर पोर्टलवर तक्रार नोंदवली. त्यानुसार जळगाव सायबर पोलिस ठाण्यात गुन्हा दाखल करण्यात आला. तपास पोलिस निरीक्षक सतीश गोराडे करीत आहेत.
