होय, आमदार एकनाथराव खडसेंसोबत मनोमिलन ! : भुसावळ नगराध्यक्ष पदासाठी लेवा-एससी समीकरणे असलेला तरुण उमेदवार देणार : माजी आमदार संतोष चौधरी

9 वर्षातील भ्रष्टाचार बाहेर काढणार !
भुसावळ पालिकेत काय चालले आहे ? हे जनतेला चांगले ठाऊक आहे मनात भरपूर काही साचले आहे मात्र घोडामैदान जवळ आहे, जाहीर सभांमधून सर्व भ्रष्टाचार आपण समोर आणणार आहोत. पाच नव्हे तर गेल्या नऊ वर्षात कशा पद्धत्तीने ठेकेदार असलेल्या नगरसेवकांचा विकास झाला हे जनतेसमोर आणू, असा दावा त्यांनी केला. आता पालिकेवर प्रशासक असून आचारसंहिता असल्याने अधिकार्‍यांनी आतातरी प्रामाणिकपणे कुठल्याही दबावाविना काम करावे, अशी अपेक्षा त्यांनी व्यक्त केली.

लेवा-एससी समीकरणे असलेला जनतेच्या मनातील उमेदवार देणार
भुसावळ पालिकेत आरक्षण कशा पद्धत्तीने काढण्यात आले हे सर्वांनाच ठाऊक आहे, असे सांगून त्यांनी आरक्षण पद्धत्तीवर टीका केली. सर्वच पदे आपल्या घरात पाहिजे ही आपली निश्चितपणे वृत्ती नाही त्यामुळे आगामी काळात 70 टक्के युवा कार्यकर्त्याला नगरसेवक पदाची आपण संधी देणार असून नगराध्यक्ष पदासाठी जनतेच्या मनातील व लेवा-एससी समीकरणे असलेला उमेदवार देणार असल्याचे त्यांनी जाहीर केले. उमेदवाराचे नाव मात्र योग्य वेळी जाहीर करू, असे सांगून त्यांनी सन्पेन्स कायम ठेवला. यापूर्वी विधानसभा राखीव झाली, आता नगराध्यक्षपद राखीव झाले तर जिल्हा परिषदेच्या तीन गटांपैकी दोन्ही राखीव झाल्याने त्याबाबतही त्यांनी आश्चर्य व्यक्त केले.

जनता पाण्याला तरसली : कोट्यवधींचा निधी गेला कुठे ?
भुसावळकरांना आजही पाण्यासाठी आटापिटा करावा लागत आहे. पाणी जवळ असूनही 12 दिवसाआड पाणी मिळत आहे मात्र दुरुस्तीकडे कोट्यवधी रुपये दुरुस्तीवर खर्च होत असून याचा हिशोब आता जनतेपुढे मांडण्याची वेळ आली असल्याचे माजी आमदार चौधरी म्हणाले. नऊ वर्ष झालेतरी जनता हालअपेष्टाच भोगत आहे मात्र आताची ही निवडणूक जनतेची आहे व जनतेने ती हातात घेतली आहे.

9 नोव्हेंबर पासून आखाडा गाजणार
माजी आमदार चौधरी म्हणाले की, 6 ते 7 नोव्हेंबरदरम्यान शनी मंदिर वॉर्डातील कार्यालयात अर्ज भरण्याची प्रक्रिया होईल तर 8 व 9 रोजी सकाळी 11 ते 5 दरम्यान अर्ज सादर केलेल्यांच्या मुलाखती होतील. जामनेरचे निरीक्षक खोडपे या प्रक्रियेसाठी उपस्थित असतील. 9 पासून भुसावळ पालिका निवडणुकीसाठी आखाडा गाजलेला दिसेल, असा दावा माजी आमदारांनी केला. यावेळी कुणाल जंगले, कृउबाचे माजी सभापती सचिन चौधरी, जयेश चौधरी व पदाधिकारी उपस्थित होते.