वंदे मातरमच्या 150 वर्षांचा गौरव उत्सव शासकीय आयटीआयमध्ये तीन हजार विद्यार्थ्यांच्या उपस्थितीत होणार
भुसावळ (6 नोव्हेंबर 2025) : शहिद राकेश शिंदे शासकीय औद्योगिक प्रशिक्षण संस्था, भुसावळ येथे ‘वंदे मातरम’च्या 150 वर्षांचा गौरव सोहळा मोठ्या उत्साहात साजरा करण्यात येणार आहे. भारतमातेच्या स्तुतीचा हा गौरव दिन महाराष्ट्रातील 358 तालुक्यांमधील पाच हजाराहून अधिक देशप्रेमींसोबत साजरा होणार आहे. भुसावळ येथे शुक्रवार, 7 रोजी सकाळी 9.30 वाजता होणार्‍या या कार्यक्रमाला सुमारे तीन हजार विद्यार्थी उपस्थित राहतील, अशी माहिती आयटीआयचे प्राचार्य महेंद्र राजपूत यांनी तहसील कार्यालयात आयोजीत बैठकीत दिली. अध्यक्षस्थानी तहसीलदार निता लबडे होत्या.
राज्यभरात एकाचवेळी उपक्रम
कौशल्य, रोजगार, उद्योजकता आणि नाविन्यता विभाग तसेच सांस्कृतिक कार्य विभाग, महाराष्ट्र शासन यांच्या संयुक्त विद्यमाने या कार्यक्रमाचे आयोजन करण्यात आले आहे.वंदे मातरम् सार्धशताब्दी महोत्सवाच्या पार्श्वभुमीवर हा उपक्रम राज्यभर एकाच वेळी पार पडणार आहे. कार्यक्रमाची सुरुवात शुक्रवार, दि 7 नोव्हेंबर रोजी सकाळी 9.30 वाजता संस्थेच्या सभागृहात होईल. उद्घाटन, प्रस्तावना व मान्यवरांचा सत्कार यानंतर विद्यार्थ्यांनी सादर केलेल्या लघुनाटिकेने देशभक्तीचा संदेश दिला जाईल. त्यानंतर कार्यक्रम अध्यक्षांचे प्रेरणादायी भाषण होईल, तर मुख्य वक्ते गिरीश कुलकर्णी वंदे मातरम’गीताचा ऐतिहासिक आणि सांस्कृतिक वारसा स्पष्ट करतील.
सामाजिक बांधिलकीची जाणीव दृढ होणार
यानंतर संपूर्ण संस्थेचे विद्यार्थी, प्राध्यापक आणि मान्यवर एकत्रीतपणे वंदे मातरम’चे सामूहिक गायन करतील. मंचावर वंदे मातरम् सार्धशताब्दी महोत्सव तालुका समितीचे अध्यक्ष, संस्थेचे प्राचार्य, प्रतिष्ठित प्राध्यापक, लोकप्रतिनिधी तसेच स्थानिक प्रशासनातील अधिकारी उपस्थित राहणार आहेत. कार्यक्रमाचे प्रमुख मार्गदर्शक म्हणून मुख्यमंत्री देवेंद्र फडणवीस यांनी प्रेरणा दिली आहे. या आयोजन बैठकीला प्राचार्य महेंद्र राजपूत, बाळू पवार, गटशिक्षणाधिकारी किशोर वायकोळे, डी.आर.जयंकार,वंदना पाटील,प्रियांका पाटील, डॉ. वंदना वाघचौरे आदींनी सक्रिय सहभाग घेतला आहे. संस्थेच्या परिसरात होणारा हा कार्यक्रम विद्यार्थ्यांमध्ये देशभक्ती, संस्कार आणि सामाजिक बांधिलकीची जाणीव दृढ करणारा ठरणार आहे.
