Foreign return engineer duped of Rs 14 crores by claiming to cure serious illness पुणे (6 नोव्हेंबर 2025) : फॉरेन रिटर्न इंजिनिअरला तब्बल 14 कोटींचा गंडा घातल्याची घटना विद्येच्या माहेरघरात घडल्याने सर्वत्र खळबळ उडाली आहे. दुर्धर आजार बरे करण्यासाठी अंगात शंकर महाराज येतात, अशी थाप मारून तरुणाची फसवणूक झाली. दीपक डोळस असे फसवणूक झालेल्या अभियंत्याचे नाव आहे.
काय घडले तरुणासोबत ?
दीपक व त्यांच्या पत्नी अंजली काही वर्षे इंग्लंडमध्ये नोकरी करत होते. त्यांना दोन दिव्यांग मुली आहेत. त्या नेहमीच आजारी राहतात. दीपक यांनी त्यांच्यावर उपचार करण्यासाठी बरीच धावपळ केली. अनेक नामवंत डॉक्टरांना दाखवले. पण फायदा झाला नाही. यामुळे ते निराशेत सापडले होते. हे दाम्पत्य 2018 मध्ये आपल्या मुलींचे व्यवस्थित संगोपन करण्यासाठी मायदेशी परतले.
हे दाम्पत्य पुण्यातील कोथरूड भागात वास्तव्यास आहे. तिथे वास्तव्यास असताना त्यांची एका भजनी मंडळाच्या माध्यमातून त्यांची ओळख राजेंद्र उर्फ दीपक खडके नामक व्यक्ती व त्याची शिष्या वेदिका पंढरपूरकर यांच्याशी झाली. या दोघांनी त्यांना त्यांच्या मुलीला आजारातून बरे करण्याचा दावा करत त्यांचा विश्वास संपादन केला.
राजेंद्र व वेदिका यांनी शंकर महाराज आमच्या अंगात येतात आणि ते दुर्धर आजार बरे करतात, अशी थाप मारली. एवढेच नाही तर वेदिकाने स्वतःच्या अंगात शंकर महाराज आल्याचा खोटा आव आणला. त्यानंतर त्यांनी डोळस कुटुंबीयांना सांगितले की, तुमचे धन आम्ही जपून ठेवल्यास व पूजा केल्यास तुमच्या दोन्ही मुली बर्‍या होतील. याच बहाण्याने या भोंदू जोडीने डोळस दाम्पत्याच्या बँकेतील सर्व ठेवी व बचत निधी स्वतःच्या खात्यात ऑनलाईन पद्धतीने वळवून घेतल्या.
इंग्लंडमधील घर व फार्महाऊसही विकले
ही भोंदू जोडी एवढ्यावरच थांबली नाही. त्यांनी दीपक डोळस यांचे इंग्लंडमधील घर व फार्महाऊस विकून त्याचेही पैसे वेदिका पंढरपूरकरच्या खात्यात वळते करून घेतले. हे सर्व करूनही मुलींच्या प्रकृतीत काहीच फरक पडला नाही त्यामुळे दीपक डोळस यांनी त्यांच्याकडे विचारणा केली. त्यावर राजेंद्र व वेदिका यांनी त्यांच्या घरात दोष असल्याचे सांगत आणखी पैशांची मागणी केली. त्यासाठी पुण्यातील मालमत्ता विकण्याची सूचना केली. त्यावर डोळस यांनी आपल्याकडे आता विकण्यासाठी काहीच उरले नसल्याचे सांगितले. त्यानंतर भोंदू जोडीने त्यांना पुण्यातील राहत्या घरावर कर्ज काढण्याची सूचना केली.
कोथरूडमध्ये विकत घेतला आलिशान बंगला
दीपक डोळस यांनी स्वतःच्या घरावर वैयक्तिक कर्ज काढले. ते पैसे त्यांनी राजेंद्र खडके व वेदिका पंढरपूरकर यांना दिले. या सर्व घटनाक्रमातून या भोंदूबाबांनी डोळस यांची एक-दोन नव्हे तर तब्बल 14 कोटींची फसवणूक केली. पोलिस तपासानुसार या रकमेच्या मदतीने खडके व वेदिका यांनी कोथरूडमधील महात्मा सोसायटीत एक आलिशान बंगला खरेदी केला आहे. ही फसवणूक मागील 2018 पासून सुरू होती. यात दीपक डोळस या उच्चशिक्षित आयटी अभियंत्याचे संपूर्ण आयुष्य उद्ध्वस्त झाले. सध्या पोलिसांनी राजेंद्र व वेदिका यांच्याविरोधात गुन्हा दाखल करून तपास सुरू केला आहे. या घटनेमुळे अंधश्रद्धेच्या नावाखाली समाजात सुरू असणारी गंभीर आर्थिक फसवणूक समोर आली आहे.
