भुसावळ (6 नोव्हेंबर 2025) : गुरूनानक जयंतीनिमित्त भुसावळ शहरात श्रद्धा आणि उत्साहाचे वातावरण बुधवारपासूनच पाहायला मिळाले. जळगाव रोडवरील गुरुद्वारात सकाळी लवकरपासूनच दर्शनासाठी भाविकांची मोठी गर्दी उसळली. प्रभात फेरी, अखंड पाठ साहेबाच्या समारोपानंतर कीर्तन, अरदास आणि गुरू-लंगर या धार्मिक कार्यक्रमांनी परिसर भक्तिमय झाला होता. दिवसभरात साधारण 5 हजारांहून अधिक भाविकांनी लंगर प्रसादाचा लाभ घेतला.
वाहतूक केली एकतर्फी
भाविकांच्या वाढत्या गर्दीमुळे जळगाव रोडवरील वाहतूक पोलिसांनी तात्पुरती एका बाजूची बंद करून सर्व वाहने एकाच दिशेने सोडण्याची व्यवस्था केली होती. त्यामुळे काही वेळ रस्त्यावर वाहतुकीचा वेग कमी झाला. मात्र वाहतूक शाखेचे अधिकारी आणि पोलिस कर्मचारी सतत मार्गदर्शन करत असल्याने गर्दीतही शिस्त राखली गेली.
शोभायात्रेने वेधले लक्ष
मंगळवारी काढण्यात आलेल्या शोभायात्रेत शहरभर धार्मिक उत्साहाने लहर निर्माण केली होती. या शोभायात्रेत शिख समाज बांधवांसह स्थानिक नागरिक मोठ्या संख्येने सहभागी झाले. तलवार फिरविणे, अग्नीचक्र, तलवारबाजीचे सादरीकरण यांसारखे चित्तथरारक खेळ पाहण्यासाठी रस्त्याच्या दुतर्फा नागरिकांची उपस्थिती उसळली. शोभायात्रेच्या मार्गावर फुलांनी स्वागत आणि सत्कार करण्यात आला.
लखनऊतील कीर्तनदारांनी दिली सेवा
बुधवारी कीर्तनासाठी लखनऊ येथील कीर्तनकार जगजीतसिंग यांनी विशेष सादरीकरण केले. त्यांच्या कीर्तनाने उपस्थित भाविक भावविभोर झाले. रात्री गुरू जन्मोत्सवाचा कार्यक्रम दिमाखात संपन्न झाला. गुरुद्वारा परिसर रोषणाई, सजावट आणि फटाक्यांच्या आतषबाजीने उजळून निघाला. ‘वाहे गुरु जी का खालसा, वाहे गुरु जी की फतह’ च्या जयघोषांनी परिसर दणाणून गेला.
यशस्वीतेसाठी गुरुद्वारा व्यवस्थापन समिती, तरुण स्वयंसेवक संघ आणि स्थानिक प्रशासनाने संयुक्तरीत्या नियोजन केले. भाविकांच्या सेवेला प्राधान्य देत सर्व व्यवस्था सुरळीत ठेवण्यात आली.
