कोयंबतूर-मदार जंक्शन दरम्यान साप्ताहिक विशेष एक्सप्रेस धावणार
भुसावळसह जळगावमधील प्रवाशांना होणार लाभ
भुसावळ (6 नोव्हेंबर 2025) : प्रवाशांची वाढती गर्दी लक्षात घेत भारतीय रेल्वे प्रशासनाने कोयंबतूर (तमिळनाडू) ते मदार जंक्शन (राजस्थान) दरम्यान साप्ताहिक विशेष एक्सप्रेस गाडी चालवण्याचा निर्णय घेतला आहे. या विशेष गाड्यांना मध्य रेल्वे भुसावळ विभागातील भुसावळ, जळगाव, अकोला, वाशिम, नंदुरबार या प्रमुख स्टेशनवर थांबे देण्यात आले आहे. भुसावळ विभागातून उत्तर भारत व दक्षिण भारताकडे प्रवास करणार्‍या नागरिकांसाठी ही गाडी उपयुक्त ठरणार आहे.
गाडी 06181 कोयंबतूर-मदार जंक्शन विशेष गाडी 13 नोव्हेंबर ते 4 डिसेंबर 2025 या कालावधीत प्रत्येक गुरुवार कोयंबतूरहून पहाटे 02.30 वाजता सुटेल आणि तिसर्‍या दिवशी 11.20 वाजता मदार जंक्शनला पोहोचेल.
गाडी 06182 मदार जंक्शन-कोयंबतूर विशेष गाडी 16 नोव्हेंबर ते 7 डिसेंबर 2025 या कालावधीत प्रत्येक रविवार रात्री 11.50 वाजता मदार येथून सुटेल आणि चौथ्या दिवशी 8.30 वाजता कोयंबतूर येथे पोहोचेल. ही गाडी तिरुप्पूर, इरोड, सालेम, काटपाडी, रेणिगुंटा, कडप्पा, कुर्नूल, काचेगुडा, निजामाबाद, नांदेड, हिंगोली, वाशिम, अकोला, भुसावळ, जळगाव, नंदुरबार, वडोदरा, रतलाम, मंदसौर, नीमच, चित्तौडगढ, भीलवाडा, अजमेर आदी प्रमुख स्थानकांवर गाडी थांबेल. या गाडीला 7 एसी थ्री टियर, 4 एसी थ्री टियर इकॉनॉमी, 7 स्लीपर क्लास आणि 2 लगेज कम ब्रेक व्हॅन असे एकूण भरगच्च आरक्षणाची सुविधा उपलब्ध असेल.
या विशेष गाडीमुळे दक्षिण भारतातील कोयंबतूर, सालेम, कडप्पा तसेच राजस्थानातील मदार, भीलवाडा, चित्तौडगढ आणि अजमेरकडे जाणे आता अधिक सोयीस्कर होणार आहे. विशेषतः भुसावळ विभागातून शिक्षण, नोकरी, व्यापार आणि यात्रेसाठी प्रवास करणार्‍यांसाठी ही गाडी मोठी सुविधा ठरू शकते.
