Three passengers killed, one critically injured in Mumbai fast local train collision मुंबई (6 नोव्हेंबर 2025) : अंबरनाथ फास्ट लोकलने धडक दिल्याने पायी चालणार्‍या तीन प्रवाशांचा जागीच मृत्यू झाला तर एक प्रवासी गंभीर जखमी झाला आहे. हा अपघात गुरुवारी सँडहर्स्ट रोड स्टेशनजवळ रुळावर घडला.
कर्मचारी आंदोलनाचा प्रवाशांना फटका
रेल्वे कर्मचार्‍यांनी केलेल्या आंदोलनामुळे लोकल सेवा बंद असल्याने सर्वच स्थानकांवर प्रचंड गर्दी वाढली होती. लोकलसेवा बंद असल्याने हे चार प्रवासी सँडहर्स्ट रोड स्टेशनजवळ रुळांवरून चालत होते, त्याच वेळी अचानक आलेल्या लोकलने त्यांना उडवले.
मध्य रेल्वेची वाहतूक विस्कळीत
सीएसएमटीवरून लोकल वाहतूक विस्कळीत झाल्यामुळे कामावरून घरी जाणार्‍या चाकरमान्यांचे प्रचंड हाल होत आहेत. रेल्वे कर्मचार्‍यांच्या आंदोलनाचा फटका ठाणे रेल्वे स्थानकावरील प्रवाशांनाही बसला आहे. मध्य रेल्वे मार्गावरील लोकल सध्या 40 ते 45 मिनिटे उशिराने धावत असून, अप आणि डाऊन दोन्ही मार्गांवर वाहतूक विस्कळीत झाली आहे.
केसच्या विरोधात झाले आंदोलन
रेल्वेचे जनसंपर्क अधिकारी स्वप्नील लीला यांनी दिलेल्या माहितीनुसार, आंदोलकांसोबत यशस्वी बोलणी झाल्यानंतर सुमारे पावणेसात वाजता लोकल सेवा पुन्हा सुरू करण्यात आली. जीआरपीने अभियंत्यांविरोधात दाखल केलेल्या केसच्या विरोधात हे आंदोलन होते. प्रशासनाच्या मध्यस्थीनंतर हे आंदोलन थांबवण्यात आले आहे. तथापि, पावणेसहा ते पावणेसात या वेळेत लोकल सेवा ठप्प असल्याने, सध्या मध्य आणि हार्बर मार्गावरील लोकल सेवा उशिराने सुरू राहणार आहे.
