Daring house burglary in Chalisgaon : Property worth four lakhs looted चाळीसगाव (7 नोव्हेंबर 2025) : चाळीसगाव शहरातील नारायणवाडी परिसरात मंगळवारी दुपारच्या सुमारास घडफोडी झाल्याने खळबळ उडाली आहे. अज्ञात चोरट्यांनी घरफोडीत सुमारे चार लाखांचा ऐवज लंपास केला.
काय घडले चाळीसगावात ?
नारायणवाडीतील मंगलाबाई दत्तात्रय नागणे (58) यांच्या जेता सायन्स अकॅडमीजवळील घराचा कडीकोयंडा तोडून चोरट्यांनी घरात प्रवेश केल्याचा प्रकार मंगळवार, 4 नोव्हेंबर रोजी सकाळी 11.30 ते दुपारी 12.40 या वेळेत घडला. घरातील लाकडी कपाट उघडून त्यामधील दागिन्यांची चोरी करण्यात आली.
चोरट्यांनी अडीच लाख रुपये किंमतीची सुमारे 50 ग्रॅम वजनाची सोन्याची पोत, 30 हजारांची सहा ग्रॅमची अंगठी, 60 हजारांची दहा ग्रॅमची बोरमाळ, 20 हजारांचे चार ग्रॅमचे टाप्स तसेच 40 हजारांची 250 ग्रॅम वजनाची चांदीची पैंजण असा एकूण सुमारे चार लाखांचा ऐवज चोरून नेला.
मंगलाबाई नागणे या जयलक्ष्मी माता नावाचे पूजा साहित्याचे दुकान चालवितात आणि घरफोडी होत असताना त्या गॅस सिलिंडर केवायसीसाठी एजन्सीकडे गेल्या मात्र परत आल्यावर त्यांनी दरवाज्याचा कडीकोयंडा तुटलेला व कुलूप खाली पडलेले पाहिले. आत पाहणी केल्यावर कपाटातील सोन्या-चांदीच्या दागिन्यांचा ऐवज चोरीस गेल्याचे स्पष्ट झाले. या प्रकरणी चाळीसगाव शहर पोलिस ठाण्यात अज्ञात चोरट्यांविरुद्ध गुन्हा दाखल करण्यात आला.
