भुसावळ नगरपालिका निवडणुकीत महायुतीसोबत लढणार का ? मंत्री संजय सावकारे यांनी मांडली ‘ही’ भूमिका
Will Bhusawal contest the municipal elections with Mahayuti? Minister Sanjay Savkare presented ‘this’ position भुसावळ (7 नोव्हेंबर 2025) : भुसावळ नगरपालिकेचा आखाडा तापण्यास सुरूवात झाली असून इच्छुकांनी गुडघ्याला बाशिंग बांधत प्रचाराला वेग दिला आहे. नाशिक विभागात एकमेव ‘अ’ वर्ग असलेल्या भुसावळ नगरपालिका निवडणुकीसाठी यंदा मोठी चुरस पहायला मिळणार आहे. भुसावळचे आमदार व वस्त्रोद्योग मंत्री संजय सावकारे यांच्या नेतृत्वात भाजपा येथे ताकदीने निवडणूक लढवणार आहे. राज्यात महायुतीची सत्ता असलीतरी मुंबई वगळता ठिकठिकाणी भाजपा, शिंदे गट व राष्ट्रवादी अजित पवार गटाने राजकीय समीकरणे पाहून काही ठिकाणी स्वतंत्र लढण्याची घोषणा केली आहे. भुसावळात महायुतीला घेवून निवडणुकीला सामोरे जाणार का? या प्रश्नावर वस्त्रोद्योग मंत्री संजय सावकारे यांनी पालकमंत्री गुलाबराव पाटील यांच्याशी चर्चा करून निर्णय घेवू, अशी भूमिका मांडली आहे.
भाजपातर्फे इच्छुकांच्या मुलाखती, अर्ज प्रक्रियेला सुरूवात
भाजपाने नगरपालिका निवडणुकीत इच्छूक असलेल्या नगरसेवकांसह नगराध्यक्ष पदासाठी इच्छूक असलेल्यांना अर्ज भरण्याचे आवाहन केले असेून हे अर्ज मंत्री सावकारे यांच्या संपर्क कार्यालयात 7 रोजी सायंकाळी पाच पर्यंत उपलब्ध आहेत. 8 रोजी मंत्री संजय सावकारे व अन्य पदाधिकार्‍यांच्या उपस्थितीत मुलाखतींना सुरूवात होणार आहे.
निवडणूक प्रभारी म्हणून न्याय देणार
भाजपातर्फे नगरपालिका निवडणुकीसाठी भाजपातर्फे प्रभारी म्हणून जवाबदारी देण्यात आली असून या निवडीला निश्चितपणे आपण न्याय देवू, अशी भूमिका मंत्री संजय सावकारे यांनी यावेळी मांडली.
सन्मानजनक जागा मिळाल्यानंतर युतीचे गुलाबरावांचे संकेत
गत रविवारी शहरातील संतोषी माता सभागृहात पालकमंत्री गुलाबराव पाटील यांनी निवडणुकीसाठी रणशिंग फुंकले होते. भुसावळसह वरणगावात शिवसेनेला कमजोर समजू नका, भुसावळ तालुका आधीपासून शिवसेनेचा बालेकिल्ला राहिला आहे म्हणून दोन्ही ठिकाणी शिवसेनेला सन्मानजनक जागा दिल्या तरच भाजप सोबत युती करू अन्यथा स्वबळावर लढू असा इशारा शिवसेना नेते, पालकमंत्री गुलाबराव पाटील यांनी दिल्यानंतर आता भुसावळात महायुती एकत्र येवून निवडणुका लढणार की स्वतंत्रपणे निवडणुकांना सामोरे जाणार? याकडे जनतेचे लक्ष लागले आहे.
