भुसावळात पालिका निवडणूक : ड्रंक अॅड ड्राइव्हसह 145 वाहनधारकांकडून दिड लाखांचा दंड वसूल
Municipal elections in Bhusawal : Fine of Rs 1.5 lakh collected from 145 vehicle owners for drunk driving भुसावळ (7 नोव्हेंबर 2025) : भुसावळ पालिका निवडणुकीच्या पार्श्वभूमीवर शहरात कायदा व सुव्यवस्था आबाधीत ठेवण्यासाठी पोलिसांकडून बुधवारी मध्यरात्रीपर्यंत विशेष नाकाबंदी आणि कोम्बिंग ऑपरेशन राबविण्यात आले. शहरातील प्रमुख चौक, गर्दीचे मार्ग तसेच संशयित भागात पोलिस पथके तैनात करून सर्वंकष तपासणी करण्यात आली. या मोहिमेदरम्यान एमव्ही अॅक्ट अंतर्गत 145 प्रकरणे दाखल करून एकूण एक लाख 52 हजार रुपयांचा दंड जागेवरच वसूल करण्यात आला. वाहतूक नियमांचे उल्लंघन, परवान्याविना वाहन चालविणे, हेल्मेट न वापरणे असे प्रकार बहुसंख्य असल्याचे पोलिसांनी सांगितले.
ठिकठिकाणी पोलिसांतर्फे कारवाई
शहरात महत्त्वाच्या ठिकाणी नाकाबंदी करण्यात आली होती. यात कारवाईदरम्यान यावल नाका, बसस्थानक, खडका रोड, नाहाटा चौफुली, जामनेर रोड परिसरात मोठ्या संख्येने पथके तैनात केली होती. वाहनांची तपासणी, कागदपत्रांची पडताळणी तसेच शहरात बाहेरून येणार्या वाहनांवर देखील विशेष लक्ष ठेवण्यात आले.
ईराणी परिसर, जाममोहल्ला आदी भागात पोलिसांनी घराघरातून पडताळणी करून संशयितांची तपासणी केली.रात्री 12 नंतर‘कोम्बिंग ऑपरेशन’राबवून निर्जन रस्ते, व्यापारी क्षेत्र आणि ओस पडलेल्या गल्लीबोळांची देखील पाहणी करण्यात आली. पोलिसांच्या यादीवरील गुन्हेगारांची तपासणी करण्यात आली.
अशी केली कारवाई
ड्रंक अँड ड्राइव्हची 8 प्रकरणे, मटका जुगारावर चार कारवाया, दारूबंदी उल्लंघनाची 7 प्रकरणे, एनबीडब्ल्यू वॉरंट बजावणी 11,बीडब्ल्यू वॉरंट बजावणी 13, पीटा कायद्यान्वये नशिराबाद पोलिस ठाण्यात 1 गुन्हा दाखल, पोलिसांकडून वारंट बजावणी करतांना जे संबंधित मिळून येत नव्हते, त्यांच्या घरी रात्री जाऊन त्यांना वारंट बजाविण्यात आले. जे अटक वॉरंट होते, त्यांना बजावून त्यांना अटक करण्यात आली.
