यावल शहरातील वंदे मातरम कार्यक्रमाचे आयोजन गोंधळात
आयोजक अधिकार्यांना खुश करण्यात मग्न : विद्यार्थ्यांचे झाले प्रचंड हाल
Vande Mataram program in Yaval city in chaos यावल (7 नोव्हेंबर 2025) : बस स्थानकाजवळील मैदानावर शुक्रवारी वंदे मातरम कार्यक्रम घेण्यात आला. या कार्यक्रमाच्या आयोजकांनी प्रचंड गोंधळात हा कार्यक्रम घेतला व देशाच्या अस्मितेचा हा कार्यक्रम पोरकट पणाने येथे पार पडला. यात आयोजक अधिकारी वर्गास खुश करण्यात मग्न दिसत होते तर कार्यक्रम स्थळावर चार तास थांबलेल्या विद्यार्थ्यांचे मात्र, प्रचंड हाल झाले. विद्यार्थ्यांना पिण्याचे पाणी, बिस्कीट देखील पुरेशा प्रमाणात न दिल्याने अनेेक विद्यार्थी उपाशी पोटी येथे थांबुन होते.
गोंधळात पार पडला कार्यक्रम
शहरात बस स्थानका जवळ प्रशासकिय पातळीवर वंदे मातरम कार्यक्रमाचे शुक्रवारी सकाळी आयोजन करण्यात आले होते. आयोजकांनी या कार्यक्रमाकरीता भव्य स्टेज उभारले होते व विद्यार्थ्यांना या कार्यक्रमाकरीता सकाळी सात वाजेपासून बोलावण्यात आले होते. अध्यक्षस्थानी तहसीलदार मोहनमाला नाझीरकर होत्या. डीवायएसपी अनिल बडगुजर, पोलिस निरीक्षक रंगनाथ धारबळे, गटशिक्षणाधिकारी विश्वनाथ धनके हे होते. या कार्यक्रमात शहरातील साने गुरूजी, सरस्वती विद्या मंदिर, बाल संस्कार, शशिकांत सखाराम चौधरी कन्या शाळा तसेच विविध इग्रजी माध्यमातील शाळेतील विद्यार्थ्यांना सकाळी सात वाजेपासून येथे बोलावण्यात आले होते. या कार्यक्रमाचे योग्य आयोजन येथे केल्याचे दिसून आले नाही परिणामी 11 वाजेपर्यंत चाललेल्या या कार्यक्रमात आयोजक केवळ व्यासपीपठावर आलेल्या अधिकारी वर्गास खुश करतांना दिसून आले. बाल विद्यार्थ्यी उन्हात चार तास बसुन होते. त्यांना पिण्यासाठी पुरेशी व्यवस्थादेेखील करण्यात आली नव्हती.
700 विद्यार्थी 267 बिस्कीट पुडे
या कार्यक्रमात विद्यार्थ्यांना पुरेशा प्रमाणात पिण्याचे पाणी येथे नव्हते व तसेच चार तास येथे थांबुन असलेल्या 700 विद्यार्थ्यांना वाटप करण्या करीता केवळ 267 प्रति दर पाच रुपये असलेले बिस्कीटचे पुडे वाटण्यात आले. यात अनेक विद्यार्थी त्यापासून वंचित राहिले तर पाच रुपयांच्या एका पुड्यात दोन ते तीन विद्यार्थ्यांनी आपसात बिस्कीट वाटप करून खाल्ले.
प्रसार माध्यमांना ठेवले लांब
या कार्यक्रमाकरिता तहसीलदार मोहनमाला नाझीरकर यांनी बैठक घेतली होती. आचारसंहिता असल्याने राजकिय पदाधिकारींना आमत्रंण नव्हते. कार्यक्रमाकरीता 75 हजारांचा निधी मिळाल्याचे आयोजकांनी सांगितले. या कार्यक्रमात पत्रकारांना व इतर माध्यमांना लांब ठेवण्यात आले होते व त्यांना आमंत्रण दिले नव्हते.
