मुक्ताईनगर तालुक्यात नैसर्गिक आपत्ती अनुदान वाटपात महसूल विभागाने केला लाखोंचा भ्रष्टाचार : आमदार चंद्रकांत पाटील यांचा दावा
महसूलच्या कर्मचार्‍यांवर गुन्हे दाखल न झाल्यास आंदोलनाचा इशारा
Corruption worth lakhs in distribution of natural disaster grant in Muktainagar taluka : MLA Chandrakant Patil claims मुक्ताईनगर (8 नोव्हेंबर 2025) : अतिवृष्टीमुळे बाधीत मुक्ताईनगर तालुक्यात झालेल्या नैसर्गिक आपत्तीत नुकसानग्रस्त शेतकर्‍यांना निधी वाटप करताना महसूल प्रशासनाने चुकीच्या पद्धतीने नुकसान भरपाईचा निधी वाटप करत लाखो रुपयांचा भ्रष्टाचार केला. संबंधित महसूल कर्मचार्‍यांवर तत्काळ गुन्हे दाखल न झाल्यास तीव्र आंदोलन करण्याचा इशारा शिवसेना शिंदे गटाचे आमदार चंद्रकांत पाटील यांनी दिला. आमदारांच्या दाव्यामुळे महसूल वर्तुळात प्रचंड खळबळ उडाली असून कारवाईकडे आता लक्ष लागले आहे.
काय आहे नेमके प्रकरण ?
मुक्ताईनगर तालुक्यात जुलै ते सप्टेंबर दरम्यान मोठ्या प्रमाणात नैसर्गिक आपत्ती होऊन शेतकर्‍यांच्या शेतजमिनीचे नुकसान झाले. काही ठिकाणी जमीन रखडून वाहून गेली तर पिकेही नष्ट झाली. अशा 19 हजार 16 शेतकर्‍यांना 24 कोटी 21 लक्ष 49 हजार 630 रुपयांची भरघोस मदत शासनाने घोषित करून शेतकर्‍यांच्या खात्यात रक्कमही आली मात्र महसूल प्रशासनाने यामध्ये गैरव्यवहार केला असून निधी अडकण्याचा प्रयत्न केल्याचा आरोप आमदार चंद्रकांत पाटील यांनी केला आहे.
सातबारा नसलेल्यांच्या खात्यावरही गेले अनुदान
राजुरा गावाचे उदाहरण त्यांनी दिले असून राजुरा गावांमध्ये काही शेतकरी हे सातबारा उतार्‍यावरच नाही त्यांच्या नावे सुद्धा रक्कम अदा करण्यात आली आहे तर काही शेतकर्‍यांच्या नावे कमी शेतजमीन असताना जास्त शेतजमीन दाखवून अनुदान लाटण्याचा प्रयत्न करण्यात आल्याने शासनाच्या निधीचा मोठ्या प्रमाणात अपहर महसूल प्रशासनाने केला. मुक्ताईनगर तालुक्यातील राजुरा येथील अनिल शांताराम कांडेलकर यांनी हा मुद्दा आमदार चंद्रकांत पाटील यांच्या निदर्शनास आणून दिला. राजुरा गावासाठी एकूण 13 लाख 45 हजार रुपये एवढी रक्कम नुकसान भरपाई म्हणून देण्यात आली. हा केवळ एकट्या राजुरा गावचा विषय असून तालुक्यात जिल्ह्यात व राज्यात अशा प्रकारे कोट्यवधी रुपयांचा अपहार केला गेला असल्याची शक्यता नाकारता येत नाही त्यामुळे खर्‍या लाभार्थींना लाभ मिळाला नसून यामागे झारीतील शुक्राचार्य कोण ? असा प्रश्न आमदार चंद्रकांत पाटील यांनी केला.
महसूल प्रशासनाविरोधात तक्रार
आमदार पाटील यांनी सरकारच्या उद्देशाचा गैरफायदा घेऊन भ्रष्टाचार करणार्‍या महसूल प्रशासनाच्या विरुद्ध तहसीलदार, जिल्हाधिकारी, आयुक्त, सचिव तसेच महसूल मंत्री व मुख्यमंत्री यांच्याकडे रीतसर तक्रार दाखल केली. 31 तारखेला तक्रार दिल्यानंतर अद्याप पर्यंत तहसीलदार मुक्ताईनगर यांनी कोणत्याही प्रकारची कारवाई या प्रकरणावर केलेली नाही. दरम्यान, राजुरा येथील तलाठी यांनी प्रकरण अंगलट येताच आठ लाख रुपये रोखीने भरल्याची माहिती आमदार चंद्रकांत पाटील यांनी पत्रकार परिषदेत दिली. एका कर्मचार्‍याकडे एवढी रोख रक्कम आली कुठून असावाही त्यांनी याप्रसंगी केला. या प्रकरणाची सखोल चौकशी करण्यात यावी तसेच एसआयटी स्थापन करण्यात यावी, अशी मागणी आमदार चंद्रकांत पाटील यांनी केली.
विधानसभेत प्रश्न मांडणार
विधानसभेत देखील हा प्रश्न आपण मांडणार असून या संदर्भात कोणतीही कारवाई झाली नाही तर शिवसेनेतर्फे तीव्र आंदोलन करण्यात येईल, असा इशारा त्यांनी पत्रकार परिषदेद्वारे दिला.
शेतजमीन नसलेल्यांनाही मिळाले अनुदान
राजुरा शेती शिवारातील गट क्रमांक चार वर 104400रू. इतके नुकसान भरपाई दर्शवण्यात आली असून गट क्रमांक चार असा सातबारा गटच अस्तित्वात नाही तसेच या गटाचे विभाजन 4/1, 4/2 असा दाखवण्यात आला आहे व त्या जमिनीवर पिकाची नोंद करण्यात येऊन नुकसान भरपाई दुसर्‍याच व्यक्तीच्या नावाने जमा करण्यात आली. अशा अनेक बोगस लाभार्थींना अनुदान वितरित करण्यात आले असून ज्यांच्या नावे शेतजमीन नाही त्यांना किंवा ज्यांच्या नावे कमी क्षेत्रफळ आहे त्यांना जास्त क्षेत्रफळ दाखवून अधिक अनुदान केल्याचा गैर कारभार करण्यात आला. या प्रकरणावर तत्काळ कारवाई करण्याची मागणी, आमदार चंद्रकांत पाटील यांनी पत्रकार परिषदेद्वारे केली आहे.
