महार वतनाच्या जमिनीवरील अन्यायाविरोधात जळगाव जिल्हाधिकारी कार्यालयावर मोर्चा
एकनाथराव खडसे यांच्या बेकायदेशीर जमिनी हस्तांतराची चौकशी व जमीन परत मिळविण्याची मागणी
Demand for inquiry into illegal land transfer of Eknathrao Khadse and return of land जळगाव (8 नोव्हेंबर 2025) : भुसावळ तालुक्यातील मानपूर शिवारातील महार वतनाच्या जमिनी माजी मंत्री एकनाथराव खडसे यांनी साखर कारखाना उभारण्यासाठी हे कारण दाखवून स्वतःच्या नावावर करून घेतल्याच्या निषेधार्थ शनिवार, 8 रोजी जिल्हाधिकारी कार्यालयावर भव्य मोर्चा काढण्यात आला. यावेळी मोठ्या संख्येने उपस्थित नागरिक, मूळ जमीनदार व सामाजिक कार्यकर्त्यांनी एकनाथराव खडसे यांच्या विरोधात घोषणाबाजी करत शासनाने तत्काळ चौकशी करून कारवाई करण्याची मागणी केली.
या निषेध आंदोलनानंतर प्रतिनिधी मंडळाने जिल्हाधिकारी कार्यालयात उपस्थित राहून अपर जिल्हाधिकारी ढगे यांना निवेदन सादर केले. निवेदनात म्हटले आहे की,
भुसावळ तालुक्यातील आमच्या पूर्वजांच्या महार वतनाच्या जमिनी या काही वर्षांपूर्वी एकनाथराव खडसे यांनी साखर कारखाना उभारण्याचे कारण देऊन आपल्या नावावर केल्य मात्र आजतागायत त्या जमिनींवर कोणताही साखर कारखाना उभारला गेला नाही, उलट वैयक्तिक फायद्यासाठी जमिनींचा वापर झाला. शासनाची दिशाभूल करून बेकायदेशीर हस्तांतरण करण्यात आले आहे.
या आंदोलकांच्या मागण्या
मूळ वतनदारांच्या हक्कांचा हा उघड अन्याय असल्याचे सांगत आंदोलनकर्त्यांनी या प्रकरणाची सखोल चौकशी करून संबंधित जमिनींच्या मूळ नोंदी तपासाव्यात, अन्यायकारक हस्तांतरण रद्द करून जमिनी मूळ वतनदारांच्या नावे परत कराव्यात तसेच बेकायदेशीर जमिनी मिळविणार्‍यांवर कायदेशीर कारवाई करावी, अशी मागणी यावेळी करण्यात आली.
या आंदोलनात अनेक सामाजिक संघटनांचे पदाधिकारी, वतनदार कुटुंबीय आणि स्थानिक नागरिक मोठ्या संख्येने सहभागी झाले होते. जिल्हाधिकारी कार्यालयासमोर घोषणाबाजीने परिसर दणाणून गेला होता.
आंदोलनकर्त्यांनी सांगितले की, राज्य शासनाने जर याकडे दुर्लक्ष केले, तर पुढील काळात मोठे जनआंदोलन उभारले जाईल.
जिल्हा प्रशासनाने हे निवेदन स्वीकारून योग्य ती कारवाई करण्याचे आश्वासन दिले.
