आमदार चंद्रकांत पाटील यांच्या आरोपानंतर मुक्ताईनगरात प्रशासन ताळ्यावर : 16 लाखांच्या भ्रष्टाचार प्रकरणी कोतवालाला बेड्या
गणेश वाघ
Administration in Muktainagar under lockdown after allegations by MLA Chandrakant Patil: Kotwala shackled in corruption case of Rs 16 lakhs भुसावळ (9 नोव्हेंबर 2025) : मुक्ताईनगरात अवकाळी पावसामुळे हतबल झालेल्या शेतकर्‍यांना दिलेल्या मदतनिधीत महसूल प्रशासनातील भ्रष्ट कर्मचार्‍यांनी भ्रष्टाचार करीत लाखो रुपयांच्या निधीवर डल्ला मारला होता. मुक्ताईनगरचे आमदार चंद्रकांत पाटील यांनी या संदर्भात पुराव्यानिशी तक्रार करीत दोषींवर गुन्हे दाखल करण्याची मागणी करीत या प्रकरणाची एसआयटी चौकशीची मागणी केली होती. आमदारांच्या आरोपानंतर हादरलेल्या प्रशासनाने मुक्ताईनगर पोलिसात 8 रोजी तक्रार देत उचंदे सजाचा कोतवाल व महसूल सेवक राहुल रवींद्र सोनवणे याच्याविरोधात 15 लाख 84 हजार 912 रुपयांचा शासकीय रकमेचा अपहार केल्याचा गुन्हा दाखल केला आहे. गुन्हा दाखल होताच आरोपीला अटक करण्यात आली.
काय आहे नेमके प्रकरण ?
मुक्ताईनगर तालुक्यात जुलै ते सप्टेंबर दरम्यान मोठ्या प्रमाणात नैसर्गिक आपत्ती होऊन शेतकर्‍यांच्या शेतजमिनीचे नुकसान झाले. काही ठिकाणी जमीन रखडून वाहून गेली तर पिकेही नष्ट झाली. अशा 19 हजार 16 शेतकर्‍यांना 24 कोटी 21 लक्ष 49 हजार 630 रुपयांची भरघोस मदत शासनाने घोषित करून शेतकर्‍यांच्या खात्यात रक्कमही आली मात्र महसूल प्रशासनाने यामध्ये गैरव्यवहार केल्याचा आरोप आमदार चंद्रकांत पाटील यांनी केला होता.
सातबारा नसलेल्यांच्या खात्यावरही गेले अनुदान
राजुरा गावाचे उदाहरण त्यांनी दिले असून राजुरा गावांमध्ये काही शेतकरी हे सातबारा उतार्‍यावरच नाही त्यांच्या नावे सुद्धा रक्कम अदा करण्यात आली आहे तर काही शेतकर्‍यांच्या नावे कमी शेतजमीन असताना जास्त शेतजमीन दाखवून अनुदान लाटण्याचा प्रयत्न करण्यात आल्याने शासनाच्या निधीचा मोठ्या प्रमाणात अपहर महसूल प्रशासनाने केला. मुक्ताईनगर तालुक्यातील राजुरा येथील अनिल शांताराम कांडेलकर यांनी हा मुद्दा आमदार चंद्रकांत पाटील यांच्या निदर्शनास आणून दिला. राजुरा गावासाठी एकूण 13 लाख 45 हजार रुपये एवढी रक्कम नुकसान भरपाई म्हणून देण्यात आली. हा केवळ एकट्या राजुरा गावचा विषय असून तालुक्यात जिल्ह्यात व राज्यात अशा प्रकारे कोट्यवधी रुपयांचा अपहार केला गेला असल्याची शक्यता नाकारता येत नाही त्यामुळे खर्‍या लाभार्थींना लाभ मिळाला नसून यामागे झारीतील शुक्राचार्य कोण ? असा प्रश्न आमदार चंद्रकांत पाटील यांनी केला.
महसूल प्रशासनाविरोधात तक्रार
आमदार पाटील यांनी सरकारच्या उद्देशाचा गैरफायदा घेऊन भ्रष्टाचार करणार्‍या महसूल प्रशासनाच्या विरुद्ध तहसीलदार, जिल्हाधिकारी, आयुक्त, सचिव तसेच महसूल मंत्री व मुख्यमंत्री यांच्याकडे रीतसर तक्रार दाखल केली. 31 तारखेला तक्रार दिल्यानंतर अद्याप पर्यंत तहसीलदार मुक्ताईनगर यांनी कोणत्याही प्रकारची कारवाई या प्रकरणावर केलेली नाही. दरम्यान, राजुरा येथील तलाठी यांनी प्रकरण अंगलट येताच आठ लाख रुपये रोखीने भरल्याची माहिती आमदार चंद्रकांत पाटील यांनी पत्रकार परिषदेत दिली होती तर एका कर्मचार्‍याकडे एवढी रोख रक्कम आली कुठून असा? असा प्रश्नही त्यांनी केला होता. या प्रकरणाची सखोल चौकशी करण्यात यावी तसेच एसआयटी स्थापन करण्यात यावी, अशी मागणी आमदार चंद्रकांत पाटील यांनी केली आहे.
अपहार प्रकरण कोतवालाविरोधात गुन्हा दाखल
मुक्ताईनगर तहसीलदार गिरीश वखारे (46) यांनी कोतवाल व महसूल सेवक राहुल रवींद्र सोनवणे याच्याविरोधात 15 लाख 84 हजार 912 रुपयांचा शासकीय रकमेचा अपहार केल्याप्रकरणी 8 नोव्हेंबर रोजी गुन्हा दाखल करण्यात आला असून त्यास अटक करण्यात आली आहे. आरोपी कोतवालाने जून 2022 ते 2025 दरम्यान चुकीच्या नोंदी, बोगस लाभार्थी, चुकीचे गट नंबर, चुकीचे क्षेत्र, चुकीचे आधार क्रमांक टाकून स्वतःच्या नातेवाईकांचे, चुकीच्या लाभार्थींचे आधार कार्ड देवून शासनाकडील 15 लाख 84 हजार 912 रुपयांची रक्कम हडप करीत शासकीय रकमेचा अपहार केल्याचे फिर्यादीत नमूद आहे. तपास पोलिस निरीक्षक आशिष शेळके यांच्या मार्गदर्शनाखाली पोलिस उपनिरीक्षक निलेश गोसावी करीत आहेत.
