भुसावळात मतदार यादीत दुबार, मृत नावे कायम : राजकीय पक्षांची बैठक गाजली
प्रांताधिकारी कार्यालयातील बैठकीत राजकीय पक्षांची तीव्र नाराजी
Double in voter list in Bhusawal, dead names remain : Political parties’ meeting is a hit भुसावळ (9 नोव्हेंबर 2025) : मतदार यादीमधील दुबार नावे, मृत मतदारांची नावे कमी करावी, एकाच मतदाराचे आडनाव बदल करीत दोन ठिकाणी नावे आहे, यावर वारंवार हरकती घेतल्यावर सुध्दा निवडणूक विभागाकडून काहीही कारवाई झाली नाही, एकाच घरातील नावे वेगवेगळ्या प्रभागात आली असून हा प्रकार अत्यंत संतापजनक असल्याची प्रतिक्रिया राजकीय पक्षाच्या पदाधिकार्‍यांची व्यक्त केली. शहरातील प्रांताधिकारी कार्यालयात शनिवारी पालिका निवडणुकीच्या पार्श्वभूमीवर राजकीय पक्षाच्या पदाधिकार्‍यांची बैठक झाली. त्यात पदाधिकारी संताप व्यक्त करीत होते.
यांची होती उपस्थिती
पालिका निवडणुकीच्या पार्श्वभूमीवर शनिवार, 8 रोजी सकाळी 11 वाजता प्रांताधिकारी कार्यालयात बैठकीचे आयोजन करण्यात आले. यावेळी निवडणूक निर्णय अधिकारी जितेंद्र पाटील, सहाय्यक अधिकारी तथा मुख्याधिकारी राजेंद्र फातले, नायब तहसीलदार संतोष विनंते आदी पालिकेचे अधिकारी उपस्थित होते.
होम वोटींगच्या सूचना नाहीत
निवडणूक अधिकारी जितेंद्र पाटील यांनी सांगितले की, उमेदवारांनी उमेदवारी अर्ज दाखल करतांना तो पहिले ऑनलाईन भरायचा आहे, नंतर तो अर्ज निवडणूक निर्णय अधिकारी यांच्याकडे सादर करायचा आहे. अर्ज भरल्यावर त्या सोबत जोडलेल्या कागदपत्रांच्या मुळप्रती या अर्ज छाननीच्या वेळेस दाखवाव्या लागणार आहे. विधानसभा निवडणुकीत होम वोटींग होते, त्याबाबत अद्याप पालिका निवडणुकीला काहीही सूचना नाहीत. अपक्ष उमेदवारांना पाच सूचक लागतील तर राजकीय पक्षाच्या उमेदवारांना एकच सूचक लागेल. उमेदवारी अर्ज भरण्यासाठी तीन हजार रुपये अमानत रक्कम तर राखीव जागासाठी दिड हजार रुपये अमानत रक्कम लागेल.
मतदार याद्यांबाबत आक्षेप
मतदार याद्यांमध्ये एकच नावे आडनाव बदल करून डबल आली आहे. तर एकाच घरातील नावे ही दोन प्रभागात विभागली आहे. काही मतदार मृत झाले असूनही त्यांची नावे फोटोसह मतदार यादीत दिसत आहे. निवडणूक विभागाकडे याबाबत हरकती घेत तक्रारी केल्यावर सुध्दा काहीही उपयोग झाला नाही त्यामुळे आता तक्रार करायची तरी कोणाकडे ? निवडणूक यंत्रणेच्या ढिसाळ कारभाराबाबत राजकीय पक्षाच्या पदाधिकार्‍यांनी तीव्र नाराजी दर्शविली. जी नावे लोकसभा, विधानसभेच्या निवडणुकीत होती, ती नावे आता मतदार यादीत नाही, असे का, या मतदारांनी आता कसे मतदान करावे, याबाबत लेखी तक्रार दिली असल्याने निवडणूक निर्णय अधिकारी यांनी लेखी पत्र देत त्या मतदारांना मतदान करू द्यावे, अशी मागणी प्रकाश कोळी यांनी केली.
फायनल यादी प्रसिध्द झाली आता उपयोग नाही
निवडणूक आयोगाच्या सूचनेवरून मतदारांची अंतीम यादी प्रसिध्द झाली आहे त्यामुळे आता कोणत्याही मतदारांची नावे त्यात टाकता येणार नाही. या यादीत आता काहीही बदल होणार नाही, नंतर पुन्हा आता दुरुस्ती करून घ्यावी, अश्या सूचना निवडणूक निर्णय अधिकारी जितेंद्र पाटील यांनी उपस्थित पक्षाच्या प्रमुखांना दिल्यात. यावेळी मुख्याधिकारी फातले यांनी सुध्दा सूचना केल्यात.
मतदान केद्रांची पाहणी
शनिवारी निवडणूक निर्णय अधिकारी पाटील, मुख्याधिकारी फातले यांच्यासह अन्य अधिकारी यांनी शहरातील मतदान केद्रांची पाहणी केली. तेथे काही त्रृटी आहे का, याची नोंद घेतली, तत्काळ तेथील त्रृटी दूर करण्याच्या सूचना पाटील यांनी संबंधित अधिकार्‍यांना दिल्यात. येत्या चार ते पाच दिवसात शहरातील सर्व मतदान केद्रांची पाहणी सर्व अधिकार्‍यांनी करावी आणि त्याचा अहवाल सादर करावा, अश्या सूचना केल्यात. यामुळे निवडणूकीशी संबंधित अधिकारी हे कामाला लागले आहे.
पिस्तूल, बंदूक जमा करण्याच्या सूचना
निवडणुकीच्या पार्श्वभूमीवर शहरातील परवाना धारक बंदूक, पिस्तूल जमा करण्याच्या सूचना डीवायएसपी संदीप गावीत यांनी दिल्या आहे.त्यामुळे शस्त्रे जमा करण्याची मोहिम पोलिसांनी सुरू केली आहे.
येथील बाजारपेठ पोलिस ठाण्याच्या हद्दीत 62 जणांकडे शस्त्रे आहे. शहर पोलिस ठाण्याच्या हद्दीत 16 शस्त्रधारी परवानाधारक आहेत. त्या पोलिस ठाण्याच्या हद्दीतही शस्त्रे जमा केली जात आहे. लवकरच सर्व शस्त्रे जमा केली जात आहे, असे डीवायएसपी गावीत यांनी सांगितले
