भुसावळ पालिका निवडणूक : युती, महाविकास आघाडीसाठी मित्रपक्ष इच्छूक मात्र जागा वाटपांवर अडले घोडे
Bhusawal Municipal Election: Alliance, allies willing for Mahavikas Aghadi but stalled on seat allocation भुसावळ (10 नोव्हेंबर 2025) : भुसावळ पालिका निवडणुकीसाठी शहरात भाजप, शिवसेना शिंदे गट, राष्ट्रवादी अजित पवार, राष्ट्रवादी शरद पवार गट, शिवसेना उबाठा गट यांनी तुर्त तरी स्वबळावर निवडणूकीची तयारी सुरू केली आहे. सर्व मित्र पक्ष युती व आघाडीसाठी इच्छूक असले तरी जागा वितरणावरुन घोडं अडले आहे. येत्या दोन दिवसांत शहरात युती व आघाडीचे चित्र स्पष्ट होईल, यानंतर खर्‍या अर्थाने मुख्य लढतीचे चित्र समोर येणार आहे.
आजपासून अर्ज भरण्यास सुरुवात
पालिका निवडणुकीसाठी सोमवारपासून उमेदवारांचे अर्ज भरण्यास सुरवात होत आहे मात्र शहरातील सर्वच राजकिय पक्ष सावध भूमिका घेत आहेत. भाजप, शिवसेना शिंदे गट व राष्ट्रवादी अजित पवार गटाची युती तसेच राष्ट्रवादी शरद पवार, शिवसेना उबाठा आणि काँग्रेसही महाविकास आघाडीच्या माध्यमातून निवडणूक लढू शकतील, मात्र त्यांच्यातही राजकिय चर्चा पुढे सरकत नसल्याचे चित्र आहे. एकंदरीत शहरातील महायुती व महाविकास आघाडीतील मित्रपक्ष युती व आघाडीसाठी इच्छूक असले तरी सध्या सर्वांनी स्वबळावर निवडणूक लढविण्याची तयारी केली आहे. शिवसेना शिंदे गट शहरात राष्ट्रवादी शरद पवार गटाकडेही जाण्याची चर्चा रंगत आहे तर दुसरीकडे मात्र गोपनीय सूत्रांनुसार शिंदे गट भाजपासोबत जागांवर तडजोड करीत महायुतीत लढणार असल्याची चर्चा आहे.
शिवसेना शिंदे गटाच्या भूमिकेकडे लक्ष
पालिका निवडणूकीसाठी शिवसेना शिंदे गटाची भाजप सोबत होणारी संभाव्य युतीही जागा वितरणावर अडली आहे. शिवसेनेने 15 जागांची मागणी केली होती. सहा प्रमुख जागांवर चर्चा फिस्कटली आहे. शिवसेना शिंदे गट आपल्याकडे येण्यासाठी राष्ट्रवादी शरद पवार गटाचेही प्रयत्न सुरू असल्याने आता शिवसेना शिंदे गट भाजपकडे कि राष्ट्रवादीकडे? याकडेही राजकिय क्षेत्राची लक्ष लागून आहे.
माजी आमदार चौधरी म्हणाले काँग्रेस आमच्यासोबत!
पालिका निवडणूकीत सर्व राजकिय पक्षांची तयारी सुरू असताना काँग्रेसची मात्र पिछेहाट आहे. सर्वांत आधी काँग्रेसने मेळावा घेतला, मात्र अद्याप ठोस भूमिका समोर आली नाही. काँग्रेस महाविकास आघाडीतील घटक पक्ष असल्याने आमच्यासोबतच आहे, असे माजी आमदार संतोष चौधरी यांनी सांगितले. सोमवारी इच्छूकांच्या मुलाखती झाल्यानंतर सर्व चित्र समोर येईल, असेही त्यांनी सांगितले.
राष्ट्रवादी अजित पवार गटाची स्वबळाची तयारी
पालिकेच्या निवडणूुीत राष्ट्रवादी अजित पवार गटाची सोमवारी मंत्री माणिकराव कोकाटे यांच्या उपस्थितीत आढावा बैठक व इच्छूकांच्या मुलाखती होत आहेत. नगरसेवक पदासाठी 75 तर नगराध्यक्षपदासाठी दोन जणांनी पक्षाकडे उमेदवारीची मागणी केली आहे. सोमवारी बैठकीनंतर संपर्क मंत्री माणिकराव कोकाटे भाजप व शिवसेना शिंदे गट या पक्षांच्या नेत्यांसोबत चर्चा करून यानंतर भूमिका जाहिर करतील, असे जिल्हाध्यक्ष उमेश नेमाडे यांनी सांगितले.
भाजपकडे 267 इच्छुकांचे अर्ज
भाजप व राष्ट्रवादी शरद पवार गटाने इच्छूकांच्या मुलाखती सुरू केल्या आहेत. भाजपतर्फे 267 इच्छूकांनी नगरसेवकांनी अर्ज केले आहेत. रविवारी रात्री उशिरापर्यंत मंत्री संजय सावकारे यांच्या संपर्क कार्यालयात मुलाखती सुरू होत्या.
शरद पवार गटाच्या मुलाखती
राष्ट्रवादी काँग्रेस शरद पवार गटाकडे 135 इच्छूकांचे अर्ज आले असून सोमवार, 10 रोजी मुलाखती होणार आहेत. राष्ट्रवादीकडून नगराध्यक्षपदासाठी सहा तर भाजपकडेही चार अर्ज प्राप्त झाले आहेत.
