आमदार खडसेंनी राजीनामा दिला नाही तर पक्षानेच केली त्यांची हकालपट्टी : भुसावळात आमदार अनिल पाटील
गणेश वाघ
MLA Khadse did not resign, the party expelled him : Bhusawal MLA Anil Patil भुसावळ (10 नोव्हेंबर 2025) : राज्यात गाजत असलेल्या पुणे जमीन घोटाळ्यात पार्थ पवारचे नाव आल्यानंतर आमदार एकनाथराव खडसेंंनी अजित पवारांच्या राजीनाम्याची मागणी केली होती. या पार्श्वभूमीवर भुसावळात आलेल्या आमदार अनिल पाटील यांना छेडले असता त्यांनी आमदार खडसेंवर टीकेचे बाण चालवले. आमदार खडसे यांनी राजीनामा दिला नाही तर पक्षाने त्यांची हकालपट्टी केली व त्यांनी राजीनामा दिला, असा दावा त्यांनी करीत खळबळ उडवून दिली.
खडसेंचे हात बरबटलेले
आमदार अनिल भाईदास पाटील म्हणाले की, मला आठवते की, खडसेवर भोसरी जमीन घोटाळ्यात आरोप झाले त्यावेळी मी भाजपात होतो त्यामुळे आमदार खडसेंनी स्वतःहून राजीनामा दिला नाही तर पक्षाने त्यांची हकालपट्टी केली त्यामुळे त्यांनी राजीनामा दिला. आमदार खडसे यांचे हात भ्रष्टाचाराने बरबटलेले असून त्यांची तुलना अजित पवारांशी होवू शकत नाही. अजित पवार हे स्वच्छ चारीत्र्य असलेले व्यक्तीमत्व आहे.
निवडणुका आल्या की अजित दादांवर आरोप
पुणे जमीन प्रकरणामुळे अजित पवार अडचणीत आले का ? या प्रश्नावर आमदार पाटील म्हणाले की, निवडणुका आल्या की अजित दादांवर विरोधक व मिडीयाकडून आरोप होतात त्यामुळे दादांनाही या आरोपांची आता सवय झाली असून त्यात तथ्य काहीच नाही, असेही आमदार म्हणाले.
भुसावळात इच्छुकांच्या मुलाखती
भुसावळातील संतोषी माता सभागृहात सोमवार, 10 रोजी रावेर लोकसभा क्षेत्रातील आठ नगरपालिका व नगरपंचायत निवडणुकांसाठी इच्छुक उमेदवारांच्या मुलाखती मंत्री माणिकराव कोकाटे यांच्या उपस्थितीत घेण्यात आल्या. यावेळी आमदार अनिल पाटीलही उपस्थित होते.
