A furniture mall and lodge were gutted in a massive fire in Faizpur: Loss of Rs 2 crore फैजपूर (10 नोव्हेंबर 2025) : शहरातील सावदा रोडवरील लक्ष्मी सॉ मिलसमोरील दोन फर्निचरसह एका लॉजला अचानक लागलेल्या भीषण आगीत जवळपास दोन कोटी रुपयांचे साहित्य खाक झाले. आगीची घटना रविवार, 9 रोजी सकाळी 11 वाजता घडली. आग एव्हढी भीषण होती की, ती विझवण्यासाठी तब्बल 25 बंब व 15 ट्रॅक्टरद्वारे पाणी आणण्यात आले. त्यानंतर तब्बल तीन तासांनी दुपारी दोन ते तीन वाजता आग आटोक्यात आणण्यात आली.
काय घडले फैजपूर शहरात
सावदा रोडवर असलेल्या शेख निसार यांचे संसार फर्निचर मॉल तसेच आणखी एक गोदरेज कपाट व फर्निचरचे दुकान व भुसावळ येथील अकबर पिंजारी यांचे राज पॅलेस लॉज या दुकानांना रविवारी सकाळी अचानक आग लागली. आगीने क्षणात रौद्र रूप धारण केले. संसार फर्निचर मॉलमध्ये असलेल्या जवळपास एक ते दीड कोटी रुपये किंमतीचे फर्निचर तसेच नव्यानेच सुरू झालेल्या लॉजमधील सर्व कुशन, एसी, टीव्ही व अन्य फर्निचर दुकानातील सामान जळून खाक झाले. आग प्रचंड भीषण असल्याने आकाशात मोठ्या प्रमाणावर धुराचे लोट दिसून आले.
विभागातून बंब दाखल
आग विझवण्यासाठी फैजपूरसह भुसावळ, यावल, रावेर, सावदा येथील अग्निबंबांनी शर्तीचे प्रयत्न केल.े तब्बल तीन ते चार तासांनी आग आटोक्यात आली मात्र या आगीत तीनही दुकानांचे जवळपास दोन कोटी रुपयांचे नुकसान झाल्याचा प्राथमिक अंदाज आहे. आगीची माहिती मिळताच शहर तथा परिसरातील नागरिकांनीही मदतीसाठी धाव घेतली. यावेळी सावदा रस्त्यावरील वाहतूक काही काळ बंद करण्यात आली. फौजदार गभाणे, फौजदार बोकील यांच्यासह पोलिसांच्या पथकाने सुद्धा परिस्थिती नियंत्रणात आणण्यासाठी मदत केली.
मंत्र्यांनी जाणली आगीची माहिती
दरम्यान आगीची माहिती मिळतात वस्त्रोद्योग मंत्री संजय सावकारे, जनार्दन हरी महाराज, आमदार अमोल जावळे, तहसीलदार मोहनमाला नाझीरकर यांनी घटनास्थळी भेटी देत माहिती जाणली.
