दिल्ली स्फोटात नऊ जणांचा मृत्यू : कारमध्ये दहशतवादी डॉ.मोहम्मद उमर असल्याचा संशय
दिल्ली (11 नोव्हेंबर 2025) : राजधानी दिल्लीतील लाल किल्ल्याजवळ सोमवारी सायंकाळी 6.52 वाजेच्या सुमारास आयट्वेंटी कारमध्ये स्फोट झाल्यानंतर दोन महिलांसह नऊ जणांचा मृत्यू झाला होता तर 24 जण जखमी झाले. दरम्यान, ज्या कारमध्ये स्फोट झाला त्यात दहशतवादी डॉ. मोहम्मद उमर असल्याचा संशय असून तोदेखील स्फोटात ठार झाल्याचा संशय आहे.
पोलिसांचे म्हणणे आहे की, उमर फरिदाबाद मॉड्यूलचा भाग असू शकतो. अलीकडेच जम्मू आणि काश्मीर पोलिसांनी हरियाणातील फरिदाबाद ते लखनऊ येथे ऑपरेशन केले आणि 2900 किलो स्फोटके (संशयित अमोनियम नायट्रेट) जप्त केली. या कारवाईत फरिदाबाद येथील डॉ. मुझम्मिल शकील आणि लखनऊ येथील डॉक्टर शाहीन शाहिद यांना अटक करण्यात आली आहे.
मृतांचे वय 21 ते 58 वर्षे होते. दोन मृतदेहांची ओळख पटली आहे. काही जण गंभीरपणे जळाले होते किंवा त्यांचे मृतदेह परिसरात पसरलेले होते. कारच्या मागील बाजूस स्फोट झाला आणि त्याचा आवाज एक किलोमीटरपर्यंत ऐकू आला. स्फोटात जवळपासच्या सहा कार, दोन ई-रिक्षा आणि एक ऑटो-रिक्षा जळाल्या.
पोलिसांच्या माहितीनुसार, स्फोट झालेल्या कारमध्ये तीन जण होते. ही कार हरियाणातील गुरुग्राममध्ये सलमानच्या नावावर नोंदणीकृत होती. पोलिसांनी सलमानला ताब्यात घेतले आहे. सलमानने ही कार पुलवामा येथील तारिकला विकली होती. पोलिस त्याचा शोध घेत आहेत.
राजधानीत शेवटचा मोठा बॉम्बस्फोट 7 सप्टेंबर 2011 रोजी झाला होता, ज्यामध्ये 11 लोक मृत्युमुखी पडले होते.
