शिवसेना पक्ष, चिन्ह कुणाचे ? उद्या निर्णायक सुनावणी

न्यायमूर्ती सूर्यकांत आणि न्यायमूर्ती जॉयमल्या बागची यांच्या खंडपीठासमोर बुधवारी या प्रकरणाची सुनावणी होणार आहे. न्यायालयात उद्धव ठाकरे गटाने दाखल केलेली मूळ याचिका आणि त्यासोबत सादर केलेले अंतरिम अर्ज यावर सुनावणी होईल. 12 नोव्हेंबरच्या कामकाज यादीप्रमाणे, या खटल्याला आयटम नंबर 19 वर स्थान देण्यात आले आहे. पक्षचिन्ह आणि अपात्रता या दोन्ही मुद्यांवरील याचिका एकत्र ऐकली जाण्याची शक्यता आहे त्यामुळे या सुनावणीदरम्यान अनेक संवैधानिक आणि राजकीय प्रश्नांवर चर्चा होणार असल्याचे दिसून येत आहे.

केंद्रीय निवडणूक आयोगाने 2022 मध्ये दिलेल्या निर्णयानुसार, शिवसेनेच्या नावाचा आणि धनुष्यबाण चिन्हाचा वापर करण्याचा अधिकार एकनाथ शिंदे गटाला देण्यात आला होता. या निर्णयाने महाराष्ट्राच्या राजकारणात मोठा भुकंप निर्माण केला. उद्धव ठाकरे गटाने हा निर्णय असंवैधानिक आणि पक्षपाती असल्याचा आरोप करत सर्वोच्च न्यायालयाचे दार ठोठावले. याचिकेत म्हटले आहे की, मूळ शिवसेना पक्षाची स्थापना आणि कार्यसंघटना उद्धव ठाकरे यांच्या नेतृत्वाखाली चालू होती त्यामुळे पक्षाच्या चिन्हावर आणि नावावर हक्क हा त्यांच्या गटाचा आहे, असे उद्धव ठाकरे यांच्या वकिलांनी स्पष्ट केले.

महाराष्ट्रातील पुढील राजकीय समीकरणे ठरणार
सुनावणीच्या पार्श्वभूमीवर उद्धव ठाकरे गटातील नेत्यांनी आशावादी सूर लावला आहे. आम्ही न्यायालयावर पूर्ण विश्वास ठेवतो. सत्य आणि न्याय आमच्याच बाजूने आहे, असे विधान उद्धव ठाकरे गटातील प्रमुख नेत्यांनी केले आहे तर शिंदे गटानेही आपली तयारी पूर्ण केल्याचे सांगितले आहे. आमच्याकडे बहुमताचा पुरावा आहे, त्यामुळे निकाल आमच्या बाजूने लागेल, असा विश्वास त्यांनी व्यक्त केला आहे. सर्वोच्च न्यायालयाचा निर्णय कोणाच्या बाजूने लागतो, यावर महाराष्ट्रातील पुढील राजकीय समीकरणे ठरणार आहेत. उद्याच्या सुनावणीनंतर धनुष्यबाण कोणाच्या हाती राहणार, हेच आता सर्वांच्या उत्सुकतेचे केंद्र ठरले आहे.