धुळ्यातील कुख्यात गुन्हेगारांची टोळी सहा महिन्यांसाठी हद्दपार
धुळे जिल्हा पोलिस अधीक्षकांचे आदेश : गुन्हेगारी वर्तुळात खळबळ
Notorious criminal gang from Dhule deported for six months धुळे (11 नोव्हेंबर 2025) : सामाजिक शांततेला अडसर निर्माण करून विविध गुन्हे करणार्‍या पाच जणांच्या टोळीला धुळे जिल्ह्यातून सहा महिन्यांसाठी हद्दपार करण्यात आल्याने धुळे जिल्ह्यातील गुन्हेगारी वर्तुळात खळबळ उडाली आहे. आगामी निवडणुकीच्या पार्श्वभूमीवर अशाच पद्धत्तीने उपद्रवींवर कारवाया सुरू राहतील, असा इशारा जिल्हा पोलिस अधीक्षक श्रीकांत धीवरे यांनी दिला आहे.
या उपद्रवींर कारवाई
टोळी प्रमुख राजेश मैकुलाल चित्ते (51), रामेश्वर मैकुलाल चित्ते (49), गोविंद मैकुलाल चित्ते (40), साहिल राजेश चित्ते (20), तरुणकुमार रामेश्वर चित्ते (21, सर्व रा.माध्यमिक शाळेजवळ, विष्णूनगर, देवपूर, धुळे) अशी हद्दपार झालेल्यांची नावे आहेत.
टोळीतील सदस्यांविरोधात गंभीर गुन्हे
सराईत गुन्हेगारांवर जबरी चोरी, खुनाचा प्रयत्न, अनधिकृत प्रकारे गृहअतिक्रमण, विनयभंग, दंगा करणे, बेकायदेशीर जमावात सहभागी होणे, दुखापत करणे, शिवीगाळ व धमक्या देणे, घातक हत्यारांनी दुखापत करणे आदी प्रकारचे देवपूर पोलिसात तीन तर पश्चिम देवपूर पोलिसात एक गुन्हा दाखल आहे.
पोलिस अधीक्षकांनी केले हद्दपार
देवपूर पोलिस निरीक्षक समाधान वाघ यांनी महाराष्ट्र पोलीस कायदा कलम 55 अंतर्गत या सराईत टोळीविरुद्ध हद्दपारीचा प्रस्ताव जिल्हा पोलिस अधीक्षकांकडे सादर केला. या प्रस्तावाची पोलिस उपअधीक्षक राजकुमार उपासे यांनी सखोल चौकशी केली आणि स्थानिक गुन्हे शाखेचे वरिष्ठ निरीक्षक श्रीराम पवार यांनी छाननी केली. छाननी झाल्यावर निरीक्षक श्रीराम पवार यांनी पोलिस अधीक्षकांकडे अविस्तर अहवाल सादर केला. या सर्व पुराव्यांच्या आधारे पोलिस अधीक्षक श्रीकांत धीवरे यांनी सुनावणी घेत पाचही गुन्हेगारांना सहा महिन्यांसाठी संपूर्ण धुळे जिल्ह्यातून हद्दपार करण्याचे आदेश दिले.
यांनी केले कारवाई
ही कारवाई धुळे पोलिस अधीक्षक श्रीकांत धीवरे यांच्या मार्गदर्शनाखाली अपर पोलिस अधीक्षक अजय देवरे, उपविभागीय पोलिस अधिकारी राजकुमार उपासे, गुन्हे शाखेचे वरिष्ठ निरीक्षक श्रीराम पवार, पोलिस निरीक्षक धनंजय पाटील, पोलिस निरीक्षक समाधान वाघ, एस.बी.तळेकर, पोलिस अंमलदार संतोष हिरे, हर्षल चौधरी, कबीर शेख व भटू बैसाणे यांनी केली.
