पालिका निवडणूक : भुसावळात भाजपा-शिंदे सेनेची अखेर युती
मंत्री संजय सावकारे यांच्या नेतृत्वात पालिकेवर झेंडा फडकवण्यासाठी युती सज्ज : सेनेला आठ जागा मिळण्याची शक्यत
Municipal elections: BJP-Shinde Sena finally form alliance in Bhusawal भुसावळ (14 नोव्हेंबर 2025) : भुसावळ पालिकेचा निवडणूक आखाडा तापल्यानंतर भुसावळात शिंदे सेना भाजपाबरोबर जाण्याची चर्चा सुरू होती मात्र जागा वाटपांमुळे घोडे अडले होते मात्र मातब्बर राजकारण असलेले वस्रोद्योग मंत्री संजय सावकारे व पालकमंत्री गुलाबराव पाटील यांच्या जळगावात झालेल्या बैठकीत युतीवर शिक्का मोर्तब करण्यात आले. समजलेल्या प्राथमिक माहितीनुसार, शिंदे सेनेला भुसावळात पाच ते आठ जागा मिळण्याची शक्यता आहे. भुसावळ पालिकेवर भाजपाचे वर्चस्व असून सत्ता अबाधीत ठेवण्यासाठी भाजपा ताकद लावून आहेत तर दुसरीकडे महाविकास आघाडीनेही शड्डू ठोकले आहेत.
एका जागेवर होणार मैत्रीपूर्ण लढत
शहरात भाजप व शिवसेना शिंदे गट युतीची चर्चा आठवड्यापासून सुरू होती. शिवसेना शिंदे गटाला राष्ट्रवादी शरद पवार गटाकडूनही सोबत निवडणूक लढण्यासाठी निमंत्रण होते. सुरुवातीला शिंदे गटाने भाजपकडे 50 पैकी 12 ते 15 जागा मागितल्या होत्या. पैकी तीन प्रमुख जागांवर घोडं अडले. गुरुवारी जळगावात दोन्ही मंत्र्यांच्या बैठकीत दोन जागांचा तिढा सुटला. या दोन्ही पैकी एका जागेवर शिंदे गटाला तर एक जागा बदलून इतरत्र उमेदवारी देण्यात आली. तरीही एका जागेचा तिढा कायम आहे.
अशी झाली तडजोड
शिवसेना शिंदे गटासाठी एका प्रभागाची जागा सोडताना भाजपला तेथील विद्यमान माजी नगरसेवकाला दुसर्‍या ठिकाणी उमेदवारी द्यावी लागणार आहे. अन्य एका जागेच्या मागणीच्या बदल्यात इतर प्रभागातील राखीव जागेवर शिंदे गटाला उमेदवारी देण्यावर चर्चा झाली. तिसर्‍या एका जागेवर मैत्रीपूर्ण लढत किंवा तोडगा निघू शकेल, असे चित्र आहे.
भाजपने शिवसेना शिंदे गटाला किती जागा दिल्या? याबाबत मात्र गोपनियता कायम आहे. सूत्रांच्या माहितीनुसार शिंदे गटाला पाच किंवा आठ जागा दिल्या जावू शकतात. ज्या जागांवर ज्या पक्षाचे अधिक प्राबल्य आहे, तेथे उमेदवारी देण्यासाठी कल आहे.
राष्ट्रवादीच्या भूमिकेकडे लक्ष
राष्ट्रवादी अजित पवार गट महायुतीचा घटक पक्ष असलातरी तरी ते महायुतीसोबत जातील वा नाही याबाबत लवकरच भूमिका समोर आल्यानंतर अधिक चित्र स्पष्ट होणार आहे.
