भुसावळ (14 नोव्हेंबर 2025) :महानगरी एक्सप्रेस (22177 डाउन) या गाडीच्या जनरल कोचमध्ये काळ्या अक्षरात‘बी आयएसआयएस पाक जिंदाबाद 12/11 बॉम्ब सुबह 8 बजे को रेल धमाका असे संशयास्पद लिखाण आढळल्याने रेल्वे प्रवाशांमध्ये खळबळ उडाली. या प्रकारानंतर रेल्वे पोलिस प्रशासन तत्काळ सावध झाले आणि संपूर्ण तपासानंतर ही घटना अफवा असल्याचे स्पष्ट झाले. या पार्श्वभूमीवर भुसावळ लोहमार्ग पोलीस ठाण्यात अदखलपात्र गुन्हा दाखल करण्यात आला आहे.
काय आहे नेमका प्रकार ?
लोहमार्ग पोलिसांकडून मिळालेल्या माहितीनुसार, भुसावळ रेल्वे सुरक्षा बल नियंत्रण कक्षातील आरक्षक वसिम खान सुलतान खान यांनी दिलेल्या फिर्यादीनुसार, 12 नोव्हेंबर रोजी पहाटे 4.30 च्या सुमारास मुंबई रेल मदतसेल, मध्य रेल्वे यांना एका प्रवाशाकडून संदेश प्राप्त झाला होता. त्या संदेशातट्रेनमध्ये कोणीतरी शस्त्र घेऊन प्रवास करत आहे,असा उल्लेख होता.सदर तक्रार प्रवाशी विजय याने दिल्याचे सांगण्यात आले. यानंतर रेल्वे सुरक्षा दलाने मनमाडहून सुटलेल्या महानगरी एक्सप्रेसमध्ये चाळीसगाव, पाचोरा, जळगाव आणि भुसावळ स्थानकांवर तातडीने तपासणी मोहीम हाती घेतली. संबंधित जनरल कोच (247451) मधील प्रत्येक प्रवाशाचे सामान तपासण्यात आले.
चेकिंगदरम्यान कोचच्या बाथरूममध्ये वरील प्रकारचे लिखाण आढळून आले.
उपनिरीक्षक रोहीतास यांनी तत्काळ त्याचे फोटोग्राफ घेतले आणि सफाई कर्मचार्‍यांकडून ते मिटविण्यात आले. नंतर तक्रारदार प्रवाशाशी संपर्क साधण्यात आला असता त्याने केवळ संशयावरून तक्रार दिल्याचे सांगितले. यावेळी गाडीचे सर्व कोच पुन्हा तपासण्यात आले, मात्र कोणतीही संशयास्पद वस्तू किंवा हत्यार आढळले नाही. त्यामुळे ही घटना पूर्णपणे अफवा असल्याचे स्पष्ट झाले.याबाबत लोहमार्ग पोलीस ठाणे भुसावळ येथे अदखलपात्र गुन्हा दाखल करण्यात आला आहे. पुढील तपास पोलिस निरीक्षक सुधीर धायरकर यांच्या मार्गदर्शनाखाली सहाय्यक पोलीस निरीक्षक हणमंत पांचाळ करीत आहेत.रेल्वे सुरक्षा दल व पोलिसांनी प्रवाशांना आवाहन केले आहे की, अफवेसदृश माहिती पसरवू नये, कारण त्यामुळे अनावश्यक भीती निर्माण होते. संशयास्पद हालचाल किंवा वस्तू दिसल्यास रेल मदतसेल अथवा जवळच्या पोलिस कर्मचार्‍यांना तत्काळ कळवावे, असे आवाहन करण्यात आले आहे.
