भुसावळ पालिका निवडणुकीत रजनीताई सावकारे भाजपाच्या नगराध्यक्षपदाच्या उमेदवार !

भुसावळातील प्रतिष्ठा महिला मंडळाच्या अध्यक्षा असलेल्या सौ.रजनी सावकारे या महिलांसाठी गेल्या 14 वर्षांपासून महिलांना विविध व्यवसाय व उद्योग वाढीसंदर्भात प्रशिक्षण देवून स्वतःच्या पायावर उभे राहण्यासाठी स्वावलंबी करीत आहेत. पंतप्रधान नरेंद्र मोदी यांनी दिलेल्या घोषणेला प्रतिसाद देत त्यांनी स्वदेशी वस्तूंचा वापर होण्यासाठी चळवळ सुरू करीत शहर व तालुक्यातील छोट्या स्थानिक व्यावसायीकांना स्थानिक स्तरावर मेळाव्याच्या माध्यमातून रोजगार मिळवून दिला असून शेकडो महिला आता त्यांच्या पायावर स्वकर्तृत्वाने उभ्या राहून संसाराला हातभार लावत आहेत.

सौ.रजनी सावकारे यांनी इनरव्हील क्लब ऑफ भुसावळ व जेसीआय ताप्ती क्लबमध्ये काम करताना विविध उपक्रम राबवून आदर्श निर्माण केला आहे तसेच प्रतिष्ठा मंडळाच्या माध्यमातून आयोजित मेळाव्यातून त्यांनी स्वयंरोजगारही महिलांना उपलब्ध करून दिला आहे.

भाजपा-शिंदे सेनेची युती अन् नगराध्यक्ष पदासाठी अर्ज दाखल
भुसावळात स्वबळावर लढणार असल्याची वल्गना आधी शिंदे सेनेने केली मात्र जागांवर वाटाघाटी होताच मंत्री संजय सावकारे व मंत्री गुलाबराव पाटील यांनी युती करण्याबाबत होकार दिला व जळगावातील बैठकीत नगराध्यक्षपद भाजपाकडे जाणार असल्याचे निश्चित झाले. त्यानंतर सौ.रजनीताई सावकारे यांनी समर्थकांसह शुक्रवार, 14 रोजी नगराध्यक्ष पदासाठी उमेदवारी अर्ज दाखल केला.

यावेळी डॉ.संगीता बियाणी, डॉ.मृणाल पाटील, माजी नगरसेविका मीना लोणारी, माजी नगरसेविका प्रीतमा गिरीश महाजन, सोनल महाजन, प्रीती कोलते, मंगला पाटील, प्रीती मुकेश पाटील आदींची उपस्थिती होती.

उद्यापासून पेटणार राजकीय आखाडा
भुसावळातील निवडणूक महायुती व महाविकास आघाडीसोबत रंगणार असून अन्य पक्ष तसेच अपक्षही या निवडणुकीत ताकद पणाला लावणार आहेत. दोन्ही प्रमुख पक्षांनी अद्याप उमेदवार जाहीर केले नव्हते मात्र भाजपाचा नगराध्यक्ष पदाचा उमेदवार जाहीर झाल्यानंतर एक-दिवसात महाविकास आघाडीचा उमेदवार जाहीर होईल तसेच नगरसेवक पदांची नावे निश्चित झाल्यानंतर राजकीय आखाडा तापण्यास सुरूवात होणार आहे. या निवडणुकीत मंत्री संजय सावकारे, माजी मंत्री एकनाथराव खडसे व माजी आमदार संतोष चौधरी यांची प्रतिष्ठा पणाला लागली आहे. सत्तेच्या सारीपाटात कोण बाजी मारणार? याकडे जनतेचे लक्ष लागले आहे.