बिहारात एनडीए-भाजपाचा विजय नव्हे तर लाडक्या बहिणींना दहा हजार दिल्याने मिळाले यश : आमदार एकनाथराव खडसे
Success in Bihar was not due to NDA-BJP’s victory, but due to giving 10 thousand to beloved sisters: MLA Eknathrao Khadse जळगाव (15 नोव्हेंबर 2025) : बिहारातील भाजपा-एनडीएला अभुतपूर्व यश मिळाले होते व यशावरून राष्ट्रवादी सुप्रीमो शरद पवार यांनी बिहारची निवडणूक महिलांनी हातात घेतली होती व लाडक्या बहिणींना निवडणुपूर्वी अधिकृतरित्या दहा हजार रुपये वाटल्याने हे यश मिळाल्याची टीका केली होती. या टीकेनंतर जळगावातील राष्ट्रवादीचे ज्येष्ठ नेते आमदार एकनाथराव खडसे यांनीही भाजपावर टीकेचे बाण चालवले आहेत. बिहार विधानसभा निवडणुकीतील एनडीएचा विजय हा पंतप्रधान नरेंद्र मोदी किंवा मुख्यमंत्री नितीशकुमार यांचा नव्हे तर लाडक्या बहिणींचा विजय असल्याचे ते म्हणाले आहेत.
निवडणूक तोंडावर पैसे वाटल्यानेच झाला विजय
बिहार विधानसभा निवडणुकीत भाजप-जदयु महायुतीचा दैदिप्यमान विजय झाला आहे. तर राजद-काँग्रेस महाआघाडीचा पुरता धुव्वा उडाला आहे. आता या निवडणुकीतील एनडीएच्या विजयाचे वेगवेगळ्या पद्धतीने विश्लेषण केले जात आहे. अनेकांनी हा विजय भाजपच्या सूक्ष्म पातळीवरील नियोजनामुळे झाल्याचा दावा केला आहे. तर काहींनी निवडणुकीच्या तोंडावर महिलांना वाटलेल्या पैशांमुळे भाजपचा हा विजय झाल्याचा दावा केला आहे. राष्ट्रवादी काँग्रेसचे अध्यक्ष शरद पवार यांनीही असाच दावा केला आहे. त्यानंतर आता त्यांच्या पक्षाचे आमदार एकनाथ खडसे यांचीही त्यात भर पडली आहे.
मध्यप्रदेशातील योजना महाराष्ट्रातून बिहारात पोहोचली
आमदार एकनाथराव खडसे म्हणाले, मध्यप्रदेशातील लाडकी बहीण योजना मध्यप्रदेशातून महाराष्ट्रात व तेथून बिहारात पोहोचली आहे त्यामुळे हे यश पंतप्रधान नरेंद्र मोदी किंवा मुख्यमंत्री नितीशकुमार यांचे नाही लाडक्या बहिणींचे आहे. एकेका महिलेला 10 हजार रुपये देण्यात आले. त्याचा मोठा परिणाम निकालावर झाला.
एकेका घरात 50 हजारांहून अधिकची रक्कम पोहोचली
निवडणूक प्रक्रिया सुरू असताना सरकारने महिलांना प्रत्येकी 10 हजार रुपये वाटले. यामुळे एकेका घरात 40 ते 50 हजारांची अधिकची रक्कम जमा झाली. त्याचा परिणाम मतदारांवर होणारच. लाडक्या बहिणींनी याच पैशांना जागून मतदान केले त्यामुळे बिहारमध्ये पंतप्रधान मोदी किंवा मुख्यमंत्री नितीशकुमार यांच्या गुणवत्तेवर अथवा कामावर मतदान झाले नाही. या निवडणुकीत लाडक्या बहिणीचा विजय झाला आहे. त्यातून काळजी करावा, असा संदेश देशभरातील मतदार व कार्यकर्त्यांना गेला आहे, असे खडसे म्हणाले.
शरद पवारांनीही केली टीका
शरद पवारांनीही बिहारमधील एनडीएच्या विजयाचे श्रेय महिलांना मिळालेल्या 10 हजार रुपयांना दिले आहे. ते शनिवारी बारामतीत पत्रकारांशी बोलताना म्हणाले, बिहार विधानसभेचे मतदान झाल्यानंतर मी काही लोकांशी संवाद साधला. त्यांच्याकडून मला असा फिडबॅक मिळाला की, ही निवडणूक महिलांनी हातात घेतली होती. सरकारने महिलांच्या खात्यात प्रत्येकी 10 हजार रुपये टाकले. त्यामुळे महिलांनी निवडणुकीत मोठ्या प्रमाणात मतदान केले.
एवढ्या मोठ्या प्रमाणात पैशांचे वाटप करणे योग्य आहे का? याचा विचार जाणकारांनी केला पाहिजे. निवडणूक आयोगानेही याचा विचार केला पाहिजे, असेही पवार म्हणाले.
