A panchayat battle will be held at the Raver Municipality arena रावेर (18 नोव्हेंबर 2025) : रावेर पालिकेचा आखाडा तापला असून सोमवारी उमेदवारी अर्ज दाखल करण्याच्या अखेरच्या दिवशी बर्‍यापैकी चित्र स्पष्ट झाली आहे. रावेरात संगीता महाजन (भाजप), शबानाबी असिफ मोहंमद (राष्ट्रवादी काँग्रेस अजित पवार गट), हमीदाबी अयूब खा (काँग्रेस), दीपिका अग्रवाल (अपक्ष), मनीषा रवींद्र पवार (शिवसेना ठाकरे गट) अशी पंचरंगी लढत होणार असून येथे अपक्षही जोर मारून असल्याने माघारीनंतर नेमकी स्थिती काय असेल? याचा अंदाज स्पष्ट होणार आहे.
माघारीनंतर अंतिम चित्र होणार स्पष्ट
रावेरमध्ये भाजपकडून डॉ. योगिता पाटील, संगीता भास्कर महाजन, नलिनी पद्माकर महाजन यांनी भाजपकडून उमेदवारी अर्ज दाखल केला होता. पण, पैकी एबी फॉर्म संगीता महाजन यांना मिळाला. दुसरीकडे राष्ट्रवादी काँग्रेस (अजित पवार गट) कडून माजी नगराध्यक्ष दारा मोहंमद यांच्या सून शबानाबी असिफ मोहंमद यांनी अर्ज भरला आहे. इतरही अपक्ष उमेदवार आहेत. त्यात दीपिका अग्रवाल व इतरांची माघारीपर्यंत काय भूमिका राहील याकडे शहराचे लक्ष आहे. दरम्यान, सोमवारी सकाळपासून उमेदवारी अर्ज दाखल करण्यासाठी पालिका कार्यालयाबाहेर गर्दी झाली होती.
