भुसावळात तीन दिवसांत नऊ जणांवर ड्रंक अ‍ॅण्ड ड्राईव्हची कारवाई
निवडणुकीच्या पार्श्वभूमीवर वाहतूक शाखेची मद्यपी वाहनधारकांवर कडक नजर
Action taken against nine people for drunk driving in Bhusawal in three days भुसावळ (18 नोव्हेंबर 2025) : भुसावळ नगरपालिका निवडणुकीच्या पार्श्वभूमीवर शहर वाहतूक शाखेकडून कायदा व सुव्यवस्था अबाधित ठेवण्यासाठी ड्रंक अ‍ॅण्ड ड्राईव्हविरोधातील मोहिम अधिक सक्रिय करण्यात आली आहे. शहरातील प्रमुख ठिकाणी दररोज कारवाई राबवली जात असून गेल्या तीन दिवसांत 9 वाहनचालकांवर कारवाई करण्यात आली आहे.
सलग तपासणी मोहिम
वाहतूक शाखेने यावल नाका, गांधी पुतळा परिसर आणि बसस्थानक क्षेत्रात सलग तपासणी मोहीम हाती घेतली आहे. मतदान काळात मद्यप्राशन करून वाहन चालवण्यामुळे अपघात, गोंधळ किंवा अनुचित प्रकार घडू नयेत यासाठी पोलिसांनी कठोर कारवाई करण्याचा निर्णय घेतला आहे. तपासणीदरम्यान मद्यधुंद अवस्थेत वाहन चालवताना आढळलेल्या 9 जणांचे वाहने जप्त करून त्यांच्यावर दंडात्मक कारवाई करण्यात आली आहे.
मद्यप्राशन केलेल्या चालकांमुळे पादचारी आणि प्रवाशांच्या सुरक्षेला धोका निर्माण होतो, त्यामुळे ही मोहीम सतत सुरू राहणार असल्याचे पोलिसांनी सांगितले. निवडणूक काळात शहरात शांतता आणि सुरक्षित वातावरण राखण्यासाठी नागरिकांनी वाहतूक नियमांचे पालन करावे, तसेच मद्यधुंद अवस्थेत वाहन चालवू नये, असे आवाहन डीवायएसपी संदीप गावीत, वाहतूक शाखेचे सहायक निरीक्षक उमेश महाले यांनी केले आहे. पोलिसांनी केस करून त्या न्यायालयात पाठविण्याची प्रक्रिया सुरू केली आहे, दररोज एका पॉईंटवर उभे राहून कारवाई रात्री उशीरापर्यत केली जात आहे.
