रावेर लोकसभा निवडणुकीत खासदार रक्षा खडसेंच्या उमेदवारीला विरोध केल्यानेच आपले तिकीट कापले ! माजी नगराध्यक्ष सुनील काळेंचा खळबळजनक दावा
गणेश वाघ
Former Mayor Sunil Kale’s sensational claim that he was denied his ticket for opposing the candidature of MP Raksha Khadse in the Raver Lok Sabha elections वरणगाव (18 नोव्हेंबर 2025) : रावेर लोकसभा निवडणुकीत खासदार रक्षा खडसे यांच्या उमेदवारीला पक्ष श्रेष्ठींकडे विरोध करीत वास्तव स्थिती जनतेसमोर आणल्याने त्याचा बदला म्हणून माझी उमेदवारी कापण्यात आल्याचा धक्कादायक आरोप वरणगावचे माजी नगराध्यक्ष सुनील काळे यांनी केला. वरणगाव पालिकेच्या निवडणुकीत काळे यांची उमेदवारी कापून दुध संघाच्या संचालिका श्यामल झांबरे यांना उमेदवारी दिल्यानंतर काळे यांनी मंगळवारी उद्विग्न होत फेसबुकलाईव्हच्या माध्यमातून तीव्र नाराजी व्यक्त केली.
हेच का एकनिष्ठतेचे फळ
फेसबुक लाईव्हमध्ये सुनील काळे यांनी पक्षाच्या नेत्यांवर थेट गंभीर आरोप केला. आपण 35 वर्षांपासून भाजपाशी एकनिष्ठ असून या एकनिष्ठतेचा फळ आपल्याला मिळाले असल्याचे ते म्हणाले. कार्यकर्ते एकडून तिकडे आल्यानंतर त्यांना उमेदववारी देण्यात आली मात्र मी एकनिष्ठ असूनही माझी उमेदवारी कापण्यात आली.
विरोध केल्याचा बदला घेतल्याचा आरेप
रावेर लोकसभेच्या निवडणुकीत खासदार रक्षा खडसेंच्या उमेदवारीला आपण तीव्र विरोध पक्ष श्रेष्ठींकडे केला होता मात्र त्याचा बदला आपली उमेदवारी कापून घेण्यात आल्याचा धक्कादायक आरोप यावेळी काळे यांनी केला. पक्षाने आदेश दिल्यानंतर रावेर लोकसभा निवडणुकीत भाजपाचे प्रामाणिकपणे काम केले मात्र माझ्यासोेबत काम करणार्यांना उमेदवारी नाकारण्यात आली, नेत्यांनी सेटलमेंट केली व पक्ष निष्ठ कार्यकर्त्यावर अन्याय केल्याचा दावा यावेळी काळे यांनी केला.
वरणगावात अखेरच्या क्षणापर्यंत लढणार !
काळे आपल्या फेसबुक लाईव्हमध्ये म्हणाले की, हा प्रकार कार्यकर्त्यांच्या मनाला वेदना देणारा आहे. भाजपाच्या एकनिष्ठ कार्यकर्त्यांना आपण विनंती करणार आहोत, मला काम करूनही न्याय मिळालेला नाही. प्रामाणिक काम करूनही जर न्याय मिळणार नसेल तर भाजपा कार्यकर्त्यांनी माझ्यासोबत यावे व आपण अखेरच्या क्षणापर्यंत लढणार असल्याचा पुर्नउच्चार त्यांनी यावेळी केला. हा बदला म्हणून पक्षनिष्ठ कार्यकर्त्यांची एक प्रकार हत्याच असल्याचेही काळे यावेळी म्हणाले.
