भुसावळात भाजपाने उघडले खाते : प्रीती मुकेश पाटील प्रभाग सात ‘अ’ मधून बिनविरोध
BJP opens account in Bhusawal : Preeti Mukesh Patil unopposed from Ward 7 भुसावळ (18 नोव्हेंबर 2025) : भुसावळ पालिका निवडणुकीचा आखाडा तापला असून आरोप-प्रत्यारोपांच्या फैरी सुरू आहेत. त्यातच मंगळवार, 18 रोजी छाननी सुरू असताना प्रभाग सात अ मधील राष्ट्रवादी अजित पवार गटाच्या उमेदवार सारीका युवराज पाटील यांच्या अर्जासोबत जोडलेला एबी फार्म हा त्यांचे पती युवराज पुंडलिक पाटील यांच्या नावाचा आल्यानंतर येथे भाजपाच्या प्रीती मुकेश पाटील या बिनविरोध निवडून आल्या. या निर्णयानंतर भाजपेयींनी जल्लोष केला. भुसावळात भाजपाची पहिली जागाी बिनविरोध झाल्यानंतर भाजपामध्ये उत्साहाचे वातावरण आहे.
काय घडले निवडणुकीत ?
भुसावळ पालिका निवडणुकीत भाजपासोबत शिंदे गट गेल्यानंतर काही जागांवर वाटाघाटी करण्यात आल्या व मुकेश पाटील यांना प्रभाग आठ ऐवजी सात अ मध्ये उमेदवारी मिळाल्यानंतर त्यांनी पत्नी प्रीती मुकेश पाटील यांचा अर्ज भरला व त्यांच्या विरोधात राष्ट्रवादी अजित पवार गटाच्या सारीका युवराज पाटील यांनी अर्ज भरला मात्र त्यांच्या अर्जासोबत लावण्यात आलेला एबी फार्म हा पती युवराज पाटील यांच्या नावाचा जोडण्यात आल्याने छाननीत सारीका पाटील यांचा अर्ज बाद ठरल्याने एकमेव प्रीती पाटील यांचा अर्ज शिल्लक राहिल्याने त्यांची बिनविरोध निवड झाली मात्र अधिकृतरित्या निर्णय माघारीनंतर जाहीर केला जाणार आहे.
पत्नीला खांद्यावर घेत केला जल्लोष
प्रीती पाटील यांचा बिनविरोध विजय झाल्यानंतर मुकेश पाटील यांनी पत्नी प्रीती पाटील यांना खांद्यावर घेत जल्लोष केला. भाजपाच्या नगराध्यक्ष पदाच्या उमेदवार रजनी सावकारे यांनीही प्रीती पाटील यांचा सत्कार केला. भुसावळातील भाजपेयींनी जल्लोष करीत भाजपाच्या विजयाच्या घोषणा दिल्या.
