यावल नगरपालिका निवडणूक : महाविकास आघाडीच्या उमेदवाराविरोधात हरकती फेटाळताच समर्थकांचा जल्लोष
चुरशीची होणार निवडणूक : नगराध्यक्ष पदासाठी सहा तर नगरसेवक पदासाठी 102 जण रिंगणात
Yaval Municipality Election: Supporters celebrate as objections against Mahavikas Aghadi candidate are rejected यावल (19 नोव्हेंबर 2025) : यावल नगरपालिकेचा निवडणूक आखाडा तापला आहे. मंगळवारी छाननीदरम्यान नगरसेवक पदाच्या 130 उमेदवारी अर्जापैकी 28 अर्ज अवैध ठरले 102 अर्ज आता वैध ठरले आहे. नगराध्यक्ष पदाच्या सात पैकी एक अर्ज वैध ठरला असून नगराध्यक्ष पदासाठी सहा उमेदवारी अर्ज आहेत. नगराध्यक्ष पदाच्या महाविकास आघाडीच्या उमेदवार छाया पाटीलसह नगरसेवकांच्या संदर्भातील तक्रारीवर सुनावण्या झाल्यानंतर त्या फेटाळण्यात आल्यानंतर समर्थकांनी मोठा जल्लोष केला. यावल पालिकेत अत्यंत चुरशीचा सामना होणार आहे.
शिंदे गटाचा अर्ज ठरला अवैध
शिवसेना शिंदे गटाचे शहरप्रमुख पंकज बारी यांनी पक्षाच्या एबी फॉर्मसह अर्ज सादर केला होता मात्र त्यावर सूचक असलेल्या व्यक्तीची स्वाक्षरी नसल्याने त्यांचा अर्ज अवैध ठरला. पक्षाचा शहरप्रमुखच कसा गाफिल राहिला? अशी चर्चा सुनावणीस्थळी रंगताना दिसून आली.
102 अर्ज वैध
निवडणूक निर्णय अधिकारी तथा तहसीलदार मोहनमाला नाझीरकर यांच्या अध्यक्षतेखाली मंगळवारी नगरपालिकेत छाननी प्रक्रिया झाली. नगराध्यक्ष पदाच्या सात पैकी एक अर्ज अवैध ठरला तर 130 नगरसेवकांच्या अर्जापैकी 28 अवैध ठरल्याने 102 अर्ज वैध ठरले.
महाविकास आघाडीचा हरकती फेटाळताच जल्लोष
यावल नगराध्यक्ष पदाच्या उमेदवार छाया अतुल पाटील व त्यांचे पती वॉर्ड क्रमांक 11 चे उमेदवार अतुल वसंतराव पाटील यांची कौटुंबिक मालमत्ता कर थकीत असल्याची तक्रार करण्यात आली तर आणि माजी नगराध्यक्षा सुरेखा शरद कोळी यांना मागील कालावधीत नगराध्यक्ष पदावरून जात पडताळणी प्रमाणपत्र अवैध असल्याने अपात्र केल्याच्या कारणावरून ज्योती नितीन सोनार अशा चार जणांविरूध्द हरकती दाखल करण्यात आल्या.
हरकतींवर युक्तिवाद होऊन सायंकाळी उशिरा निवडणूक निर्णय अधिकारी यांनी वादी यांच्या हरकती फेटाळत चारही उमेदवारांचे अर्ज वैध ठरवले. नगराध्यक्ष पदाच्या अफरीन अंजूम शे. अलीम यांचा अर्ज एबी फॉर्म अभावी अवैध ठरवण्यात आला. उमेदवारांच्या हरकती फेटाळल्याने वैध ठरलेल्या अर्जदारांच्या समर्थकांनी पालिकेसमोर मोठा जल्लोष केला.
माघारीनंतर चित्र होईल स्पष्ट
आता नगराध्यक्ष पदासाठी सहा अर्ज तर नगरसेवक पदांसाठी 102 अर्ज वैध आहेत. अर्ज माघारीच्या अंतिम कालावधीपर्यंत किती उमेदवार अर्ज मागे घेतात त्यानंतरच अंतिम चित्र स्पष्ट होणार आहे.
