उमेदवारी नाकारल्याच्या मानसिक धक्क्यात शिंदे गटाच्या महिला पदाधिकारी बेपत्ता
पतीचे स्थानिक पदाधिकार्‍यांवर गंभीर आरोप : गडचिरोलीतील प्रकार
Shinde group’s female office bearer goes missing in shock over rejection of candidature गडचिरोली (19 नोव्हेंबर 2025) : उमेदवारी नाकारल्याच्या मानसिक धक्क्यातून गडचिरोलीत शिंदे महिला गटाच्या पदाधिकारी बेपत्ता झाल्याने राजकीय वर्तुळात खळबळ उडाली आहे.
गडचिरोली जिल्ह्यातील आरमोरी येथे शिवसेना शिंदे गटाच्या महिला आघाडीच्या जिल्हाप्रमुख अर्चना गोंदोळे या मंगळवारपासून बेपत्ता असून यांच्या पतीने स्थानिक पदाधिकार्‍यांवर गंभीर आरोप केले आहेत. उमेदवारी नाकारल्याने त्यांना जबर मानसिक धक्का बसला असून, याच विवंचनेतून त्या घरातून निघून गेल्याचे त्यांचे पती संतोष गोंदोळे यांचे म्हणणे आहे.
अर्चना गोंदोळे या अनेक वर्षांपासून राजकारण आणि समाजकारणात सक्रिय आहेत. त्यामुळे आरमोरी नगरपालिकेच्या निवडणुकीत त्यांना पक्षाकडून नगरसेवक पदाकरिता उमेदवारी मिळेल, अशी त्यांची अपेक्षा होती मात्र पक्षांतर्गत राजकारणामुळे त्यांना ऐनवेळी उमेदवारी नाकारण्यात आली. इतकेच नव्हे, तर त्यांच्या ऐवजी इतर पक्षातून आलेल्या एका महिलेला संधी देण्यात आल्यामुळे गोंदोळे अत्यंत दुखावल्या होत्या. याच नैराश्यातून त्या गेल्या सुमारे 20 तासांपासून बेपत्ता झाल्या आहेत.
बेपत्ता अर्चना गोंदोळे यांचे पती संतोष गोंदोळे यांनी शिवसेनेच्या स्थानिक पदाधिकार्‍यांवर थेट आणि अत्यंत गंभीर आरोप केले आहेत. स्थानिक पदाधिकार्‍यांनी नगरपालिकेसाठी ’पैसे घेऊन’ उमेदवारी वाटप केली, ज्यामुळे अर्चना यांना डावलण्यात आले, असा आरोप संतोष गोंदोळे यांनी केला. अर्चना यांच्या जीवाचे काही बरे-वाईट झाल्यास याला सर्वस्वी शिवसेनेचे स्थानिक पदाधिकारी जबाबदार असतील, असेही ते म्हणाले
