दोंडाईचा पालिकेवर भाजपाचा झेंडा : आधी नगराध्यक्ष नंतर 26 जागांवर नगरसेवक बिनविरोध

सुरूवातील नगराध्यक्ष बिनविरोध 
दोंडाईचा वरवाडे नगर परिषदेच्या निवडणुकीत गेल्या 40 वर्षापासूनचा संघर्ष बाजूला सारून डॉ. हेमंत देशमुख गटाला भाजपावासी करण्यात मंत्री जयकुमार रावल यांना यश आले. त्यानंतर रणनिती आणून मंत्री रावल यांनी सुरुवातीला नगराध्यक्ष नयनकुंवर रावल व 7 जागा बिनविरोध केल्या तर माघारीच्या शेवटच्या दिवशी उर्वरीत सर्व 19 जागांवरील भाजपाच्या उमेदवारांना बिनविरोध करण्यात जयकुमार रावल यांना यश आले.

दोंडाईचा नगर परिषदेत गेली चार दशके भाजपचा कट्टर विरोध मानला जाणारा डॉक्टर हेमंत देशमुख यांचा गट हा भाजपाम दाखल झाला. मंत्री रावल यांच्या नेतृत्वाखाली व पक्षाच्या उच्चस्तरीय चर्चेनंतर हा ऐतिहासिक तिढा सुटला. या महत्वपूर्ण बदलामुळे दीर्घकाळ चाललेला राजकीय संघर्ष संपुष्टात आला आणि बिनविरोध निवडणूक प्रक्रियेचा पाया मजबूत झाल्याचे बोलले जात आहे.

महाविकास आघाडीच्या कार्यपद्धत्तीवर प्रश्नचिन्ह
मंत्री जयकुमार रावल यांचा करिष्मा पाहायला मिळत असला तरी दुसरीकडे मात्र महाविकास आघाडीच्या कार्यपद्धतीवरच प्रश्नचिन्ह राजकीय वर्तुळातून निर्माण केले जात आहे. अशी कोणती राजकीय समीकरणे फिरवली की ज्यामुळे महाविकास आघाडीसह सर्वच विरोधी पक्षांच्या उमेदवारांना आपलं उमेदवारी अर्ज मागे घ्यावा लागला? अशी चर्चा राजकीय वर्तुळात रंगू लागली आहे.