भुसावळ (22 नोव्हेंबर 2025) : जळगाव जिल्ह्यात पालिका निवडणुकांच्या माध्यमातून राजकीय आखाडा तापला असताना भाजपा युतीतील उमेदवारांच्या प्रचारार्थ मुख्यमंत्री देवेंद्र फडणवीस यांची प्रचार सभा सोमवार, 24 रोजी दुपारी दोन वाजता पु.ओं.नाहाटा महाविद्यालयासमोरील नियोजित बसस्थानकाच्या जागेवर होणार असल्याची माहिती मंत्री संजय सावकारे यांनी दिली. जळगाव जिल्ह्यात केवळ मुख्यमंत्र्यांची एकच सभा होणार असल्याने या सभेकडे जिल्ह्याचे लक्ष लागले आहे.
पोलिस अधीक्षकांकडून जागेची पाहणी
मंत्री संजय सावकारे यांच्या कार्यालयाला गुरुवारी मुख्यमंत्र्यांच्या सभेबाबत मेल आल्यानंतर तातडीने सूत्रे हलली तर जिल्हा पोलिस प्रशासनातर्फे जागा व बंदोबस्ताच्या नियोजनासाठी पोलिस अधीक्षक डॉ.महेश्वर रेड्डी, पोलिस उपअधीक्षक संदीप गावीत व अधिकार्‍यांनी नियोजित सभा स्थळाची पाहणी केली. यावेळी मंत्री संजय सावकारे, उद्योजक मनोज बियाणी व भाजपा पदाधिकारी उपस्थित होते.
