भुसावळात प्रभाग क्रमांक 9 अ मध्ये रंगणार अनुभवी, मुरब्बी काकांसोबत पुतण्याची लढत

भाजपा उमेदवाराचा राष्ट्रवादी शरदचंद्र पवार गटातील उमेदवाराशी मुकाबला ः लढतीकडे लागले शहरवासीयांचे लक्ष


भुसावळ (24 नोव्हेंबर 2025) : भुसावळात निवडणूक आखाडा तापला असताना अनेक प्रभागात चुरशीच्या लढत होणार असल्याचे चित्र स्पष्ट झाले आहे. त्यातच भुसावळातील प्रभाग क्रमांक 9 अ मध्ये मंत्री संजय सावकारे यांचे कट्टर समर्थक, अनुभवी व मुरब्बी नेता म्हणून ओळख असलेल्या युवराज लोणारी यांची लढत प्रतिस्पर्धी राष्ट्रवादी शरदचंद्र पवार गटाचे उमेदवार व नात्याने पुतण्या असलेल्या जयंत लोणारी यांच्याशी होणार आहे. एकूणच या भागात 35 वर्षांपासून राजकारणात सक्रिय व नगरसेवक राहिलेल्या काकांना कडवी झूंज देण्यासाठी पुतण्या रिंगणात उतरला आहे.

भाऊबंदकीत मात्र चुरशीची लढत
भाऊबंदकीच्या या चुरशीच्या लढतीत पुतण्या की काका बाजी मारणार? हे तर निवडणूक निकालाअंतीच स्पष्ट होणार आहे मात्र या लढतीकडे संपूर्ण शहरवासीयांचे लक्ष लागले आहे.






1991 व 1996 च्या निवडणुकीत शिवसेना, 2001, 2011 च्या निवडणूकीत राष्ट्रवादी काँग्रेस, 2016 च्या निवडणूकीत भाजपकडून युवराज लोणारी यांनी विजय मिळवला असून 2006 च्या निवडणुकीत त्यांच्या पत्नी मीना लोणारी यांचा विजय झाला आहे.

भुसावळातील राजकारणात नगरसेवक युवराज लोणारी हे मुरब्बी राजकारणी मानले जातात शिवाय मंत्री संजय सावकारे यांचे ते खंदे समर्थकही आहेत. एकीकडे शहरातील सत्ताधारी व विरोधक एकमेकांविरोधात लढत असताना दुसरीकडे मात्र लोणारी यांच्या परिवारातील पुतण्या पालिकेतील निवडणुकीच्या रिंगणात उभा आहे. मतदार प्रभागाच्या सत्तेच्या चाब्या काकांच्या हाती देतात की पुतण्याच्या? हे निवडणुकीच्या निकालानंतरच कळणार आहे.

 



मेहनत कर, मेहनत ! कॉपी पेस्ट करू नको !